Три години од трагедијата на „Струма“ во која изгореа 45 македонски граѓани

Денес се навршуваат три години од кобната автобуска несреќа на автопатот „Струма“ во Бугарија, во која животот го загубија 45 македонски државјани, меѓу кои 13 деца, а седуммина беа тешко повредени. Трагедијата остави длабока болка и отвори бројни прашања за безбедноста и одговорноста.

Автобусот на компанијата „Беса Транс“ удри во заштитната ограда кај клучката Бошнек, излетал од коловозната лента и се запалил во раните утрински часови. Пожарот однесе 45 животи, вклучувајќи го и возачот, кој според пресудата на бугарските власти е прогласен за виновен за несреќата.

Во Македонија, сопственикот на „Беса Транс“, Беким Хаџиу, беше осуден на една година и осум месеци затвор за фалсификување документи што ги користеле возачите при напуштање на државата. Компанијата, пак, доби четиригодишна забрана за меѓународен превоз и парична казна од 800 илјади денари.

Иако болката сè уште е свежа, на местото на несреќата нема никакво обележје кое би потсетувало на трагедијата што ги потресе двете држави. Останува само тагата за изгубените животи и надежта дека оваа трагедија ќе биде опомена за сите да работат на поголема безбедност во сообраќајот.