119 години старо шише со порака откриено во театар во Единбург

При реставрацијата на Кралскиот театар во Единбург, љубител на театарот открил шише старо 119 години, внимателно скриено зад декоративна круна над сцената. Откритие што ќе го објави Би-би-си открива значајни имиња на луѓето кои го изградиле театарот во 1906 година.

Мајк Хјум, кој учествувал во организирана обиколка на театарот, бил изненаден кога при ставањето на раката зад круната, наишол на старо шише. Се работело за обиколка во рамките на реконструкцијата на театарот, вредна 40 милиони фунти.

„Беше како сцена од ‘Индијана Џонс’“, изјави Хјум.

Шишето било затворено со малтер, но низ стаклото можела да се види белешка. Со помош на мобилен телефон, Хјум забележал рачно напишано име – В. С. Крукшенк, главниот градежен изведувач. По неколку месеци работа, експерти успеале да ја извадат пораката од внатрешноста.

Во листата се вклучени имињата на архитектите, градителите и занаетчиите кои работеле на изградбата на театарот. На врвот на списокот се наоѓа Вилијам Стјуарт Крукшенк, познат градежен изведувач, заедно со архитектите Џон Даниел Свонстон, Џејмс Дејвидсон и Џон Талок.

Откритието ќе биде искористено во новата изложба на театарот, каде што ќе бидат прикажани шишето, белешката и деталите за луѓето кои ја оставиле својата трага во ова културно наследство.

Кралскиот театар, изграден во 1905 година, се реновира и се очекува реконструкцијата да биде завршена до 2026 година. Театарот треба повторно да се отвори во пролетта на 2025 година.

Аби Пенделбери, менаџерка за културно наследство во театарот, нагласи дека ова откритие е фасцинантно и открива вистинска човечка поврзаност со минатото: „Ова покажува колку било лично за многу луѓе и како постои вистинска човечка врска со минатото“.