Одлуката на САД е неочекувана, ќе ја погоди автомобилската индустрија кај нас, смета професорката Мојсоска-Блажевски

Одлуката САД да и воведе висока царина од 33 отсто е неочекувана за бизнисот во Македонија и индиректно ќе влијае врз одредени компании чии производи се извезуваат во САД преку ЕУ, смета професорката Никица Мојсоска Блажевски.

– Одлуката е неочекувана. Она што го дознаваме е дека пресметката е базирана на дефицитот на САД во надворешно трговската размена со една земја. Според нашите податоци Македонија има дефицит во размената на САД, извозот е околу 110 милион евра, увозот е околу 180 милиони евра и заради тоа не се очекуваше ваква одлука.

Податоците од американското биро за статистика покажуваат дека Македонија има суфицит во трговската размена со САД и затоа оттаму произлегува оваа висока царинска стапка, вели Мојсоска Блажевски.

Според неа ова секако ќе влијае врз одредени компании, но во моментов тоа не би го намалило доаѓањето на странски компании кај нас.

– Би рекла дека многу поголем ќе биде индиректниот ефект односно ефектот кој нашите компании го имаат преку одредени производи во ЕУ потоа кон САД. Исто така мислам дека ќе доведе до намалување на идни можни инвестиции од САД, пред се на дијаспората која отвораше се повеќе компании во Македонија кои примарно извезуваат во САД.

Индиректниот ефект е кај автомобилската индустрија, петрохемиската индустрија, сметам дека и услугите ќе бидат засегнати, посебно кај компаниите кои ги отвора нашата дијаспора – истакна извршната директорка на „Македонија 2025“.