Руте: Војната во Украина не е регионален, туку глобален конфликт

Војната во Украина не е регионална војна, туку глобален конфликт, изјави денеска генералниот секретар на НАТО Марк Руте во заедничка изјава со украинскиот министер за надворешни работи Андриј Сибига во седиштето на алијансата во Брисел.

-Русија работи заедно со Северна Кореја, Кина и Иран. Кинескиот претседател Си Џинпинг гледа кој ќе победи во војната и не се сомневам дека тоа ќе има влијание врз неговите одлуки и следните чекори во Тихиот и Индискиот океан, додаде Руте. 

Тој повика кога ќе се постигне прекин на огнот или мировен договор за Украина, тоа да биде трајно решение. Сојузниците продолжуваат да ја поддржуваат Украина, истакна генералниот секретар.

-Многу сме благодарни за поддршката од сите сојузници, рече министерот Сибига. 

Вечерва има состанок на Советот НАТО-Украина, дојдов овде да зборувам за мир – фер, траен, сеопфатен, резимира тој.

Украина покажа подготвеност да постигне мир. Ја прифативме понудата на САД за безусловен, привремен и целосен прекин на огнот за 30 дена. Таа понуда се уште постои, но гледате дека наместо да ја прифати, (рускиот претседател Владимир) Путин поставува услови. Русија мора да биде сериозна за мирот. Време е да се зголеми притисокот врз Москва. Време е за дипломатија, но и за притисок и воздржаност, инсистираше Сибига.

Според него, Русија претставува опасна по живот закана за Европа. 

Министерот прецизираше дека Украина денес издвојува 26 отсто од буџетот за одбрана и успева сама да покрие 40 отсто од воените потреби.