Со кого копретседаваше Муртезани? Министерот ги помеша Бретел и Суперти

Во соопштението на Министерството за европски прашања, како и во објавите на социјалните мрежи од страна на министерот Орхан Муртезани беше наведено дека тој денеска копретседавал со Третиот состанок на Мониторинг комитетот за ИПА III, заедно со Валентина Суперти од Европската комисија, иако на состанокот учествуваше Сигрид Бретел.

Бретел е раководителка на Одделението за Македонија и Албанија при Генералниот директорат за соседство и преговори за проширување и денеска во Скопје заедно со Муртезани копретседаваше со состанокот. Таа се осврна на важноста од јасно дефинирани обврски и активности за надминување на сегашните предизвици во управувањето со ИПА програмите.

На фотографиите споделени од состанокот јасно се гледа дека пред Бретел стои и знак со нејзиното име, но очигледно и тоа е малку за министерот и неговиот тим да знаат со кого одржуваат состаноци.

Мониторинг комитетот за ИПА е највисокото надзорно тело за сите ИПА програми и има задача да обезбеди ефективна, транспарентна и усогласена реализација на европската претпристапна помош во Северна Македонија, во согласност со Рамковната спогодба за финансиско партнерство помеѓу Европската комисија и Република Северна Македонија.