19 годишна Русинка осудена на речиси 3 години затвор бидејќи го осудува конфликтот во Украина

Рускиот суд изрече затворска казна од речиси три години на Дарја Козирева, млада активистка која користела поезија од 19 век и графити за да протестира против конфликтот во Украина.

Козирева (19) е прогласена за виновна за постојано „дискредитирање“ на руската армија, откако поставила плакат со стихови од украинска поезија на јавниот плоштад и дала интервју за Sever.Realii,, сервис на руски јазик на Радио Слободна Европа.

Таа се изјасни за невина, нарекувајќи го случајот против неа „една голема измислица“, според записникот од судењето составен од Медиазона, независен медиум.

Таа е осудена на две години и осум месеци затвор.

Козирева е една од околу 234 лица затворени во Русија поради нивната антивоена позиција, според извештајот на Меморијал, руска група за човекови права, добитничка на Нобеловата награда.

Во декември 2022 година, на само 17-годишна возраст, Козирева со црна боја напишала антивоен графит на скулптура од две испреплетени срца, подигната пред музејот Ермитаж во Санкт Петербург кој ги претставува ги врските на градот со Мариупол, украински град кој во голема мера беше срамнет со земја за време на опсадата.

На почетокот на 2024 година, откако беше казнета со 30.000 рубли (370 долари) за објавување за Украина на интернет, Козирева беше избркана од медицинскиот факултет на Државниот универзитет во Санкт Петербург.

Еден месец подоцна, на двегодишнината од конфликтот, таа залепи парче хартија со фрагмент од стих од Тарас Шевченко, татко на модерната украинска литература, на неговата статуа во паркот во Санкт Петербург.

Козирева беше брзо уапсена и задржана во истражен притвор речиси една година, додека не беше пуштена во домашен притвор овој февруари.

Обраќајќи се пред судот во петокот, Козирева рече дека верува дека не извршила никакво кривично дело.

„Немам никаква вина, совеста ми е чиста. Затоа што вистината никогаш не е виновна“.