Која е сопругата на американскиот министер што ѝ испраќал доверливи информации?

Џенифер Роше Хегсет, сопруга на американскиот министер за одбрана Пит Хегсет, се најде во центарот на нов скандал што го потресе Пентагон. Нејзиното име се појави во приватна група на апликацијата „Сигнал“, каде што нејзиниот сопруг наводно споделувал чувствителни воени информации за планирани напади во Јемен, иако таа нема никаква официјална функција во Министерството за одбрана ниту поседува безбедносна дозвола за пристап до класифицирани податоци.

Џенифер, добро позната во медиумските кругови, особено во конзервативните, долго време работела како извршен продуцент на емисијата „Fox & Friends“ на Фокс Њуз. Таму и се запознала со Пит Хегсет, кој бил чест гостин, а подоцна и ко-водител на емисијата. Тие се во брак од 2019 година и имаат ќерка стара седум години. Таа е трета сопруга на Хегсет.

Иако формално не е вработена во Пентагон, таа често го придружува својот сопруг на службени патувања, па дури присуствувала и на состаноци со високи странски претставници, како оној со британскиот министер за одбрана Џон Хили и адмиралот Тони Радакин во март годинава. Според „Волстрит Џурнал“, чувствителни информации се разменувале и за време на состанок на министрите за одбрана на НАТО, каде што и таа била присутна.

Најновите откритија, првично објавени од „Њујорк Тајмс“, го посочуваат постоењето на втора приватна група на „Сигнал“ под името „Одбрана | Тимско дружење“, создадена уште во јануари, пред Хегсет официјално да ја преземе функцијата. Во групата биле неговата сопруга, брат му Фил Хегсет (висок советник во Пентагон), личниот адвокат Тимоти Парталоре и уште десетина блиски соработници.

Според изворите, на 15 март министерот Хегсет споделил „детални информации“ за претстојните воздушни напади врз положбите на Хутите во Јемен, вклучувајќи и распореди на летови со борбени авиони F/A-18 Hornet. Истите информации наводно ги пренел и во друга група, каде што по грешка бил вклучен и главниот уредник на списанието „Атлантик“, Џефри Голдберг – што доведе до првиот голем скандал.

Групата, според изворите, била наменета за логистика и организациски комуникации, а не за воени операции. Иако бил предупреден дека апликацијата не е доволно безбедна за такви информации, Хегсет продолжил да користи приватен телефон и неофицијални канали.

Случајот отвора сериозни прашања за злоупотреба на службена положба, непочитување на безбедносните протоколи и мешање на лица без овластување во процесите на националната безбедност на САД.