Не се само камерите – Кои ќе бидат новите правила за возачите, пешаци и моторџиите во сообраќајот?

Македонија ги воведува новите, построги казни за сообраќајни прекршоци, кои ќе бидат на сила најверојатно од почетокот на идната година. Ова го предвидуваат измените во Законот за прекршоци и безбедност во сообраќајот. Двете законски решенија се веќе објавени на електронскиот регистар на прописи ЕНЕР, а предвидено е да важат од почетокот на идната година. Со овие измени, земјата го зајакнува својот пристап кон сообраќајната безбедност, приближувајќи се до европските стандарди и казнени политики.

Една од клучните промени е одземането на возачката дозвола по сериозни прекршоци. Например, минувањето на црвено светло ќе биде казнувано со глоба од 300 евра и одземање на возачката дозвола за најмалку три месеци. Оваа мера ја позиционира Македонија меѓу земјите со најстроги казни за овој тип на прекршок.

Во случај кога дозволата ќе биде одземена двапати во период од четири години, возачот ќе мора повторно да го полага возачкиот испит. Овој процес, кој ќе биде задолжителен по одредени прекршоци, има за цел да ја зголеми безбедноста на патиштата и да го намали бројот на сериозни инциденти.

Промена на системот за одземање дозволи и известување преку електронски канали
Со новите измени, се забрзува процесот на информирање на возачите за одземање на дозвола. По правосилноста на судската пресуда, судот ќе има обврска во рок од две недели да ја информира полицијата, која ќе ја извести возачот преку текстуална порака или електронска пошта. Овој брз процес има за цел да го олесни извршувањето на казните и да го намали времето за реакција на возачите.

Македонија ќе ги заостри и правилата за пешаците, моторџиите и велосипедистите. Пешаците кои користат мобилни телефони, слушалки или други електронски уреди додека преминуваат улица ќе бидат казнувани со глоба од 40 евра. За слични прекршоци, но кај моторџиите и велосипедистите, глобата ќе изнесува 50 евра. Овие мерки имаат за цел да го зголемат вниманието и свеста на сите учесници во сообраќајот.

Камери за автоматско снимање на прекршоци

Како дел од новата политика, Македонија ќе имплементира камери за автоматско снимање на сообраќајни прекршоци. Камерите ќе снимаат прекршувања како минување на црвено светло, пречекорување на брзината, неправилно престројување и користење на мобилен телефон. Казните за овие прекршоци ќе се испраќаат електронски на возачите, а снимките ќе се чуваат шест месеци, освен ако не се потребни како докази во кривични или прекршочни постапки.

Во многу европски земји, постојат слични системи за автоматско следење на прекршоци, но казните во Македонија ќе бидат посериозни за некои прекршоци. За минување на црвено светло, на пример, во Норвешка глобата може да достигне до 756 евра, а во Германија глобите за ваков прекршок започнуваат од 90 евра и можат да достигнат до 360 евра во зависност од последиците.

За повторно полагање на возачки испит по одземање на дозволата, многу европски земји, како Германија и Франција, веќе имаат задолжителни медицинско-психолошки процени и повторно полагање на теоретски и практичен дел на испитот по сериозни прекршоци. Во Франција, за возачите кои изгубат сите казнени поени на својата дозвола, исто така следи медицински и психолошки преглед.

Заврши со слушалки: Нови правила за пешаците

Европските земји како Шпанија и Франција веќе казнуваат возење на велосипед со слушалки со казни до 400 евра. Во Македонија, пешаците ќе бидат казнувани со 40 евра за користење на мобилен телефон или слушалки додека преминуваат улица, што е во согласност со европските трендови за зголемена безбедност на патиштата.

Со оваа заострена сообраќајна политика, Македонија се стреми да ги намали сообраќајните несреќи и да ја зголеми безбедноста на патиштата, при што се става на исто ниво со европските земји во примена на строгите санкции и автоматските системи за следење прекршоци.