Штумфастичното село во Андалузија

Скриено меѓу ридови и костенови шуми, селото Хузкар е едно од најнеобичните места во Европа. До 2011 година изгледаше како и другите андалузиски села – со традиционални бели фасади. Но, сè се промени кога „Sony“ го одбра токму ова место за промоција на анимираниот филм за Штрумфовите и го обоја во сино.

Иако планот беше по промоцијата да се врати старата боја, мештаните одлучија да го задржат синиот изглед. Туризмот процвета, бројот на посетители драстично се зголеми, а Хузкар стана познат како „селото на Штрумфовите“, единствено во светот.

Веднаш по пристигнувањето, ќе ве воодушеви погледот од „Mirador del Pueblo de Júzcar“. Прошетајте низ селото и посетете го „Parque de Júzcar“, мал парк со игралиште и интересни Штрумфови детали – идеално место за забавни фотографии.

Истражувајќи ги улиците, ќе го забележите муралот на Гаргамел на хотелот „Casa del Bandolero“. Во близина, улиците „Calle Sol“ и „Calle Fuente Caraila“ се украсени со шарени мурали кои раскажуваат приказни преку бајковити дрвја и животински ликови. Не заборавајте да се фотографирате на познатите сини скали – една од најфотографираните локации во селото.

Ако сакате спомен од ова магично место, посетете ја продавницата „Милагрес“, каде што ќе најдете сувенири инспирирани од Штрумфовите – играчки, книги, чаши и украси. По прошетката, одморете во бар „Торичели“, каде можете да уживате во локални специјалитети и традиционални шпански предјадења.

За љубителите на адреналин, Хузкар нуди зиплајн кој минува над селото, нудејќи незаборавни погледи од воздух. За време на викендите, достапни се и други авантуристички активности погодни за сите возрасти. Доколку сте љубител на природата, истражете ги околните ридови пеш или со велосипед, а наесен можете да берете печурки и костени.

Иако Штрумфовите одамна заминаа, Хузкар остана волшебно место кое докажува како една мала заедница може да ја претвори промената во можност. Ако сте љубител на необични дестинации, додајте го ова село на вашата листа и доживејте ја магијата на единственото сино село во светот!