Skip to content
Со три минути тишина, граѓаните го изразија својот револт пред Собранието по трагичното загинување на Фросина Кулакова, испраќајќи силна порака за правда и одговорност. Илјадници присутни стоеја во молк со порака дека на сите може да ни се случи откако пред неколку дена 22-годишната девојка беше прегазена од возило управувано од Васил Јованов, кој возел пијан и без возачка дозвола.
Тишината беше погласна од секој збор – таа беше знак на тага, но и на бес кон системот кој повторно потфрли. По минутите на молк, колоната се упати кон Основното јавно обвинителство и Кривичниот суд, каде граѓаните со транспаренти бараа правда: „Безбедноста е право, не луксуз“, „Судии, ослободете ја правдата“ и „Улиците не се тркачки патеки“.
Маршот го предводеа родителите и сестрата на Фросина, а голем број учесници носеа црни маички со натпис „Правда за Фросина“. Протестот, кој заврши пред Кривичниот суд, беше порака дека трагедиите како оваа не смеат да останат без одговорност.
