Јавна дебата за безбедност во сообраќајот: Децата од мали нозе се учат за безбедноста во сообраќајот

Републичкиот совет за безбедност, како што посочи нејзиниот претседател Горан Ангелковски, водејќи се од статистичките податоци за бројот на случени сообраќајни незгоди, причините и послоедиците од нив, смета дека е потребна зајакнување на казнената регулатива, воведување на негативни бодови за потешки прекршоци кои ќе се изрекуваат кумулативно а не како замена за изречената глоба, зголемување на ефикасноста на казнените постапки, имплементирање на системот „безбеден град“, намалување на влијанието на човечкиот фактор при одлучување за прекршоците како и забрзување на казнената постапка. 

На денешната јавна расправа на тема: „Анализа и утврдување на потребата за изменување на законската регулатива со цел зајакнување на безбедноста на сообраќајот“ зборуваше и министерот за внатрешни работи Панче Тошковски. 

„Казните, колку и да се високи на хартија, не значат ништо ако тие не се изрекуваат, а уште помалку ако не се спроведуваат. Ние мораме да го разбиеме овој систем на компромиси и полуправда, односно неправда“, рече Тошковски.

Сообраќајната култура се учи од мали нозе во семејството и во градинките смета и директорката на Психијатриската болница Славица Арсова. 

-Она што сум убедена и како експерт и како родител, она што семејството ќе го пропушти, во првите години од животот, не може ниеден систем да го надомести. 

-Мора граѓаните да бидат свесни. Немојте да им купувате на децата џипови кога ќе наполнат 18 години. Не е тоа никаков престиж. Им давате опасно орудие во рака, им давате репетиран пиштол. Последиците се такви какви што се, вели професорката Лажетиќ.