Владината коалиција во слободен пад

Владината коалиција во Северна Македонија сè повеќе изгледа како разнишан брод кој едвај плови во политичките бури што секојдневно се засилуваат. Од ден на ден, несогласувањата, конфликтите и разединувањата меѓу нејзините членови стануваат сè поочигледни, поткопувајќи ја стабилноста на владејачката структура.

Последниот во низата судири е оној меѓу пратеникот Антонио Милошоски и министерот за правда Игор Филков, кој избувна во јавноста и сигнализираше подлабоки проблеми во комуникацијата меѓу коалициските партнери. Милошоски, поранешен близок соработник на Никола Груевски, отворено го обвини Филков за нефункционалноста на правосудниот систем, додека министерот возврати со остра реторика, нарекувајќи го „кусурот на Груевски“. Доколку ова беше изолиран случај, можеби ќе се сметаше за обична политичка препирка, но кризата во коалицијата трае речиси една година.

Внатрепартиска нестабилност во ВМРО-ДПМНЕ

Состојбите во ВМРО-ДПМНЕ исто така се далеку од стабилни. Трајко Славески, екс-министер и актуелен претседател на Советот на Град Скопје, во својата анализа за хаосот во системот индиректно го посочи Зоран Ставревски, поранешен министер за финансии и близок човек на Груевски, како еден од виновниците за регулаторната гилотина донесена во 2008 година. Оваа негова изјава само долева масло на веќе разгорените тензии во партијата, која сè потешко ги балансира различните струи и интереси.

Дополнителна динамика во внатрепартиските превирања внесува и тивкото, но сеприсутно ривалство меѓу министерот за локална самоуправа Златко Перински и градоначалникот на Кисела Вода, Орце Ѓорѓиевски, кои двајцата се гледаат како сериозни кандидати за градоначалничката позиција во Скопје на претстојните избори.

Раскол во коалицијата ВРЕДИ

Иако јавно кажа дека нема да дава оставка, сепак се погласни се тврдењата дека министерот за здравство Арбен Таравари и неговата Алијанса за Албанците брзо ќе ја напуштат коалицијата ВРЕДИ, а со тоа и владината коалиција.

Според написи на одредени медиуми на синоќешниот состанок на партијата се разгледувале опциите дали да се остане во ВРЕДИ или пак да се воспостави соработка со опозициската ДУИ во пресрет на локалните избори.

Централното претседателство не донело конечна одлука, но најавило следни чекори во наредните денови.

Односите со претседателката Давкова во заладување

Паралелно со овие потреси, односите меѓу ВМРО-ДПМНЕ и претседателката Гордана Силјановска Давкова се ладат со забрзано темпо. Долгите периоди без јавна комуникација меѓу неа и функционерите на партијата само го зајакнуваат впечатокот дека таа станува непожелен фактор за раководството на ВМРО-ДПМНЕ.

Овој пат, историјата можеби се повторува – како што Мицкоски некогаш се дистанцираше од Данела Арсовска, сега изгледа дека се подготвува за истото сценарио со Давкова.

Дали Мицкоски ја губи контролата?

Среде овие потреси, премиерот Мицкоски упорно тврди дека ситуацијата е под контрола. Но, институционалните случувања говорат поинаку. Најавената смена на државниот јавен обвинител беше привремено стопирана поради случувањата во Кочани, а правосудните органи покажуваат знаци на самостојност преку активни истраги. Јавниот обвинител за гонење организиран криминал неодамна поднесе кривична пријава против телохранител на Мицкоски, фатен во продажба на службени тајни, што дополнително го разнишува имиџот на владејачката структура. Специјализираното одделение за истрага на полициски службеници секојдневно отвора нови случаи, вклучувајќи и против вработени во Министерството за внатрешни работи, кое традиционално било бастион на ВМРО-ДПМНЕ.

Сè на сè, владината коалиција не само што се соочува со структурни слабости, туку изгледа дека полека се распаѓа. Тензии, поделби, корупциски скандали и отворени политички пресметки го разнишуваат темелот на власта, оставајќи ја иднината на коалицијата неизвесна.