Зошто сè повеќе Европејци ги бојкотираат патувањето во САД

Давид Переира од Франција, кој со години бил воодушевен од американската култура, неодамна ја откажа својата долгоочекувана семејна тура до Јелоустоун. Причината? Растечката агресивна реторика на Доналд Трамп и сè поголемото чувство дека Америка повеќе не е добредојдена за Европејците.

„Како многу Французи, сме пораснати со американската култура, ја сакаме. Но ова веќе е неверојатно“, вели Переира за CNN Travel.

„Следев вести и мислев – ова не може да биде реалност. Сè беше лажна вест врз лажна вест.“

Со слични чувства се соочуваат сè повеќе Европејци кои ги откажуваат своите патувања поради стравови од одбивање влез, апсења на граница поради политички ставови или безбедносни проблеми. Некои земји, како Ирска, Данска, Германија, Велика Британија и Финска, издадоа предупредувања до своите граѓани дека би можеле да бидат вратени и покрај валидни визи, а трансродовите лица би се соочиле со дополнителни потешкотии.

Британската писателка Фара Мендлесон изгуби 800 фунти откако откажа едномесечно патување низ САД, стравувајќи дека нејзините левичарски ставови ќе ѝ предизвикаат проблеми на граница. „Не сакам да ги поддржувам ваквите политики со своите пари“, рече таа.

Иако американскиот државен секретар Марко Рубио се обиде да ги увери странците дека нема за што да се грижат „освен ако не доаѓаат да поддржат Хамас“, бројките говорат поинаку. Во март, бројот на пристигнувања од странство (освен Канада и Мексико) опадна за 12%. Туристичките агенции во Европа бележат драматичен пад – Accor хотелите имаат 25% помалку резервации од Европа, а во Франција, агенцијата Voyageurs du Monde пријавува пад од 20%.

„Никогаш не сум видел ваков пад за која било дестинација“, вели Жан-Франсоа Ријал, директор на агенцијата. „Американците велат дека нема пад во бројките? Глупости се тоа.“

Само во февруари, бројот на Канаѓани што патувале со автомобил во САД опаднал за 15%. Резервациите за летови помеѓу Канада и САД за периодот април–септември се намалени за над 70%.

Во Европа се шири и граѓанско движење за бојкотирање на патувањата во САД. Фејсбук групи како „boycott USA“ имаат десетици илјади членови во Данска, Германија, Франција, Италија и други земји. Швеѓанецот Јохан Бјорнсон ја откажа својата крстарење од Мајами за 2026 поради навредливиот однос на американската администрација кон претседателот Зеленски.

„Не беше политика, беше напад. Лично беше“, вели тој.

За многу Европејци, како Данецот Јакоб Бол, кои ја гледаат Америка како најблизок сојузник, ваквата промена е како предавство. „Сега не само што не сме пријатели – како да почнаа тепачка со нас“, вели Бол, кој ги откажа своите планови да патува во Синсинати и Нешвил. „Како потрошувач, гласаш со сопствените чекори.“

Дури и родителите, како Роберт Кристиансен од Данска, се откажуваат од патувања за да ја видат својата ќерка во Тексас, стравувајќи од безбедносни ризици и потенцијални последици поради нивната активност на социјалните мрежи.

„Не можам да ѝ верувам на американската влада“, вели Кристиансен.