Крај на една ера: Зошто Клаус Шваб се повлекува од Светскиот економски форум во Давос

По повеќе од половина век на чело на една од највлијателните глобални платформи за дијалог меѓу политичката и економската елита, Клаус Шваб – основачот на Светскиот економски форум во Давос – официјално се повлекува од функцијата претседател на Управниот одбор.

Во соопштението испратено до јавноста, Шваб наведе дека на прагот на својата 88-ма година одлучил „да се повлече од позицијата претседавач, но и како член на Управниот одбор, со важност веднаш“.

Симбол на глобалниот дијалог

Клаус Шваб го основа Светскиот економски форум (WEF) во 1971 година, со визија да создаде неутрална платформа каде светските лидери, економисти, бизнисмени, научници и активисти ќе можат да разговараат за најголемите предизвици на човештвото.
Во текот на 55 години, Форумот стана синоним за глобален дијалог – од климатските промени, преку дигиталната револуција, до геополитичките тензии.

Секоја зима, малото швајцарско гратче Давос станува центар на глобалната моќ: таму се среќаваат шефови на држави и влади, директори на најголемите корпорации, интелектуалци и претставници на граѓанското општество. Под мотото „Посветени на подобрување на состојбата во светот“, Форумот беше и место на надеж, но и мета на критики поради елитизмот и затворениот карактер.

Тивко повлекување во време на променети приоритети

Повлекувањето на Шваб доаѓа во период кога самиот Форум губи дел од своето глобално влијание. Последните години, интересот за Давос опаѓа – особено во споредба со други влијателни собири како Минхенската безбедносна конференција. Дел од критичарите велат дека WEF сè повеќе станува симбол на „празен глобализам“, оддалечен од реалните проблеми на светот.

Шваб, сепак, останува уважен како визионер и „архитект на дијалогот“, кој рано препозна важноста на поврзувањето на јавниот и приватниот сектор во време на глобални кризи и трансформации.

Кој ја презема палката?
Управниот одбор на Светскиот економски форум именуваше привремен наследник – потпретседателот Петер Брабек-Летма, поранешен директор на Nestlé, кој ќе ги преземе обврските на Шваб додека не се избере ново трајно раководство. Сè уште не е јасно каква ќе биде иднината на Форумот и дали ќе се менува неговиот концепт.

Инаку, Светскиот економски форум е фондација со седиште во Женева и со канцеларии во Њујорк, Пекинг и Токио. Вработува околу 600 луѓе ширум светот.