Дали Германија ќе ја забрани AfD?

Германската разузнавачка служба ја означи АфД како десничарска екстремистичка организација, што сега ја забрзува дебатата за забрана на партијата.

Германската разузнавачка служба во петокот официјално ја означи крајнодесничарската партија АфД како десничарска екстремистичка група, што би можело дополнително да ги забрза дискусиите за евентуална забрана на партијата.

Агенцијата објави дека повеќемесечната истрага потврдила дека партијата спроведувала активности насочени кон поткопување на слободниот демократски поредок во земјата, пренесува „Еурактив“.

Досега, само регионалните организации на AfD во Тирингија, Саксонија и Саксонија-Анхалт беа етикетирани како десничарски екстремисти. На национално ниво, партијата беше третирана како „сомнителен случај“ кога стануваше збор за десничарски екстремизам.

„Она што претходно се сметаше за сомнеж, сега стана сигурност во клучните области“, се вели во соопштението на агенцијата.

Во интерен извештај од 1.100 страници, агенцијата наведува дека обидите на партијата да исклучи одредени општествени групи од рамноправно учество во општествениот живот не се во согласност со Уставот и принципот на човеково достоинство.

Оваа проценка сама по себе не го проширува опсегот на средства што разузнавачките служби можат да ги користат за следење на партијата, но би можела да доведе до поинтензивна употреба на постојните инструменти.

Агенцијата сега има законска основа да користи методи на надзор – вклучително и регрутирање информатори и спроведување финансиски истраги – штом се појави сомневање за екстремистичка идеологија. Исто така, може да ги следи партиските комуникации, но само со претходно одобрение од парламентот.

Се очекува АфД правно да ја оспори оваа одлука на суд.

Можна забрана на партијата

Оваа одлука дополнително ја разгорува сè поинтензивната дебата за тоа дали партијата треба да биде забранета – и можно е процесот сега да добие нов моментум.

Било кој од четирите уставни тела во Германија – Бундестагот, Бундесратот, федералната влада или Федералниот уставен суд – може да покрене постапка за забрана на политичка партија.

АфД во моментов, според некои анкети, е најпопуларната партија во Германија, со поддршка од околу 26 проценти. Други анкети покажуваат дека поддршката за таа партија е приближно еднаква или малку помала од онаа на Христијанско-демократската унија (CDU).

На федералните избори во февруари, AfD го дуплираше бројот на освоени гласови (22%) и стана најголемата опозициска сила во новата парламентарна сесија.

Федералната министерка за внатрешни работи Ненси Фесер ја поздрави одлуката како „јасна и недвосмислена“, нагласувајќи дека канцеларијата има „јасен законски мандат да дејствува против екстремизмот и да ја заштити нашата демократија“. Таа, исто така, нагласи дека целиот процес бил спроведен непристрасно и без политичко влијание.