Изненадување во Европа: Најдобра земја за вложување во недвижности во 2025 година е Молдавија!

Според најновиот извештај на британската осигурителна компанија William Russell, Молдавија е прогласена за најдобра европска земја за инвестирање во недвижности за 2025 година.

Анализата ги вклучува даноците на имот, приходите од закуп, како и просечните бруто приноси од изнајмување. Молдавија го доби највисокиот вкупен резултат благодарение на инвестициите во инфраструктурата на главниот град Кишињев, порастот на туризмот и бизнис-секторот, како и растечката популарност на винската индустрија и културното наследство. Сето тоа ја прави краткорочната наемнина многу исплатлива.

На второто место се најде Литванија, членка на ЕУ, со стабилен раст на цените на недвижностите и експлозивен раст на цените за изнајмување – дури 170% повисоки од 2015 година. Бруто приносот изнесува 6,39%, а трошоците за купување се максимално 4,1%.

Третото место му припаѓа на кандидатот за членство во ЕУ – Северна Македонија, која нуди едноставни процедури за купување, ниски даноци и државни субвенции. Според анализата, земјата нуди годишен бруто принос од 6,47%, што ја прави особено атрактивна за странски инвеститори.

Во групата земји со високи приноси влегуваат и Србија, Ирска и Летонија – сите со поврат над 7%. Меѓу поволните дестинации за вложување се и Андора, Црна Гора и Бугарија, кои нудат добар приход од закуп при ниски даночни стапки.

Италија се истакнува со трет највисок бруто принос – 7,56%, иако даночната стапка е повисока (21%). Шпанија останува традиционално привлечна дестинација за инвеститори, особено поради побарувачката во туристичкиот сектор и законот кој ги штити вложувачите. Градот Аликанте е наведуван како пример за ниски цени, висока пополнетост и добра инфраструктура.

Велика Британија и САД со забавен раст

Во Велика Британија, цените на недвижностите паднале за 0,6% во април, со годишен раст од 3,4%. Просечната цена на имотот сега изнесува 270.752 фунти, но се очекува стабилизација преку лето поради новите даночни олеснувања.

Во САД, продажбата на постојни куќи е намалена за 5,9% на годишно ниво, со пад од 2,4% споредено со истиот период лани.

Во Кина, цените на становите стагнирале во март, но на годишно ниво има пад од 4,5%. Во регионот на Азија и Пацификот има раст на инвестициите во комерцијални недвижности од 20%, при што пазарот во Јужна Кореја бележи скок од 58% – достигнувајќи 6,8 милијарди долари и се позиционира веднаш зад Јапонија.