ЕУ размислува за царини на „Боинг“ – цените на авионите би можеле да „полетаат“

Европската унија планира воведување царини на американските цивилни авиони произведени од компанијата „Боинг“, како дел од потенцијален одговор во случај да пропаднат трговските преговори со Вашингтон.

Според извештај на Фајненшл тајмс, Европската комисија, која е задолжена за трговската политика на ЕУ, сака да ги вклучи авионите на „Боинг“ во листата на увозни производи од САД вредни околу 100 милијарди долари годишно, кои би можеле да бидат предмет на царини.

Мерките, кои треба да добијат поддршка од земјите-членки со квалификувано мнозинство, ќе стапат на сила само доколку не се постигне напредок во разговорите за намалување на американските тарифи врз европски производи.

Трговскиот баланс – во фокусот повторно

Шефот за трговија на ЕУ, Марош Шефчович, изјави дека Унијата нема намера да прифати неправеден договор под притисок од Вашингтон. Од „Боинг“ и од Европската комисија сè уште нема официјални реакции.

Во моментов, извозот од ЕУ во САД е погоден од американски тарифи од 25% на челик, алуминиум и автомобили, и од 10% на широк спектар други производи – вклучително и авиони. Овие царини може да достигнат и до 20% по истекот на тримесечниот мораториум наметнат од претседателот Доналд Трамп, кој завршува на 8 јули.

Што значи ова за европските авиокомпании?

Европските авио-превозници имаат нарачано стотици летала од „Боинг“, со оглед на растечкиот глобален авијациски пазар. Но, воведувањето нови тарифи би можело драстично да ги зголеми нивните трошоци.

Индустриски извори велат дека Европската комисија сака да постигне рамнотежа во третманот меѓу „Боинг“ и европскиот конкурент „Ербас“, особено поради американските царини кои претходно ги погодија европските производи.

За разлика од трговскиот конфликт во 2020–2021 година, овојпат и европските и американските авио-компании имаат заедничка позиција: укинување на сите царини поврзани со авијацијата.