Skip to content
Во Основниот кривичен суд Скопје денеска ќе се отвори процесот против 50-годишниот скопјанец Зоран Јованов, обвинет дека со своето постапување создал „општа опасност“ и индиректно придонел за смртта на 22-годишната пешачка Фросина Кулакова.
Обвинителството тврди дека во периодот од ноември 2022 до јануари 2025 година Јованов му го препуштал семејното „Пежо 207“ на својот син Васил, иако знаел дека тој нема возачка дозвола и веќе е евидентиран како повеќекратен сторител на сообраќајни деликти. Синот, управувајќи го истото возило под дејство на алкохол, на 29 јануари годинава ја удри Кулакова на булеварот „Партизански Одреди“, при што младата девојка почина на лице место.
Во обвинителниот акт се наведува дека Јованов „лекомислено сметал оти нема да настанат штетни последици“, иако бил запознаен со досегашното досие на својот син: една сообраќајна несреќа со полесни последици во ноември 2022, единаесет прекршоци (без дозвола, возење под дејство на алкохол, непочитување семафори и пешачки премин) во 2023 и 2024, како и самата трагедија од јануари 2025.
На 13 мај годинава судот веќе го осуди Васил Јованов на 12 години затвор, парична казна и петгодишна забрана за управување возило, откако тој ја призна вината. Како олеснителни околности беа прифатени признанието и каењето, а како отежнителни – тежината на делото, претходната затворска казна за трговија со дрога и долгата листа сообраќајни прекршоци.
Сега правосудието треба да утврди дали и таткото, со дозволувањето малолетник и неискусен возач да управува автомобил, има кривична одговорност за смртта на Кулакова и за загрозувањето на безбедноста на сите учесници во сообраќајот.