Skip to content
Западна Европа оваа година го доживеа најтоплиот јуни во историјата на мерењата, при што голем дел од регионот беше погоден од екстремен топлотен стрес. Според најновиот извештај на Службата за климатски промени „Коперникус“ на Европската Унија, јуни 2025 бил трет најтопол на глобално ниво, веднаш зад јуни во 2024 и 2023 година, но токму овој јуни постави рекорди низ цела западна Европа.
Во Шпанија и Португалија, температурите се искачија и над 46 степени Целзиусови, додека многу делови од континентот доживеаја услови што телото ги чувствува како над 38 степени – прагот на таканаречениот „многу силен топлотен стрес“. Тоа, според експертите, значително го зголемува ризикот по здравјето на милиони граѓани.
„Во свет што се затоплува, топлотните бранови ќе стануваат сè почести, поинтензивни и поопасни“, предупреди Саманта Бургес од Коперникус. Таа посочи дека екстремната жештина, дополнително засилена од високите температури на морската површина во западниот Медитеран, предизвикала зголемена влажност и минимално ладење преку ноќ, што уште повеќе ги отежнува условите за живот.
Топлински куполи, метеоролошки појави кои задржуваат топол воздух над една област, беа клучниот фактор зад двете најтешки серии на топлотни бранови – првата во втората половина на јуни, втората кон самиот крај на месецот. Резултатот: поголемиот дел од Франција, Италија, Балканот и Пиринејскиот Полуостров беа претворени во вистински климатски котли.
Истовремено, температурите на морската површина достигнаа рекордни 27°C, што не само што го наруши морскиот екосистем, туку и ја намали можноста за ладење на крајбрежните области. Влијанието беше дополнително влошено од пожари, загадување и ризици по јавното здравје.
Истражувањата покажуваат дека Европа се затоплува најбрзо од сите континенти. Според податоците на Коперникус, околу 12 земји и 790 милиони луѓе ширум светот се соочиле со рекордни температури во јуни. Во Кина, 102 метеоролошки станици забележале најтопол јунски ден досега, а делови од САД, Канада, Јужна Африка и Пакистан беа погодени од разорни топлотни бранови и поплави.
Научниците сè повеќе стравуваат дека заложбите од Парискиот климатски договор – да се ограничи глобалното затоплување на 1,5°C – стануваат недостижни. Со сегашното темпо, човештвото би можело да го пробие тој праг веќе до 2030 година, отворајќи врата кон непредвидливи климатски и еколошки кризи.
Во меѓувреме, Европа – епицентарот на последниот бран екстремни температури – се бори со реалноста што го најавува новото климатско нормално: подолги, потопли и посмртоносни лета.
