Се шири конфликтот меѓу Тајланд и Камбоџа – ново бојно поле, десетици загинати

Конфликтот на границата меѓу Тајланд и Камбоџа драматично се проширува, откако трет ден по ред траат интензивни судири, а денеска се отвори и ново бојно поле во крајбрежната покраина Трат, соопшти Ројтерс.

Најмалку 30 лица загинале, вклучувајќи 19 тајландски војници, пет камбоџански војници и осум цивили, а повеќе од 130.000 се принудени да ги напуштат своите домови. Тајландската морнарица потврди дека новото жариште е оддалечено над 100 километри од првичните точки на конфликт, што дополнително ја влошува безбедносната состојба во регионот.

Обвиненија и дипломатска офанзива

Двете страни меѓусебно се обвинуваат за започнување на насилствата. Тајландскиот амбасадор во ОН го обвини Камбоџа дека поставила мини на тајландска територија и започнала напади во четврток наутро. Камбоџа остро ги негираше овие тврдења, наведувајќи дека делувала во самоодбрана.

„Тајланд ја повикува Камбоџа веднаш да ги запре сите непријателства и агресивни дејствија и да се врати на дијалогот со добра волја“, изјави тајландскиот амбасадор Чердчај Чаивавид пред Советот за безбедност.

Борба за храмови и територија

Граничниот спор трае со децении, со фокус на древните храмови Та Моан Том и Преах Вихер. Иако Меѓународниот суд на правдата му го додели храмот Преах Вихер на Камбоџа уште во 1962 година, тензиите ескалираа во 2008 година кога Камбоџа се обиде да го стави храмот под заштита на УНЕСКО како светско културно наследство – потег што Тајланд го смета за провокација.

Тајландски премиер: „Ситуацијата може да прерасне во војна“

Вршителот на должноста премиер на Тајланд, Фумтам Вечајачаи, изрази сериозна загриженост за развојот на ситуацијата.

„Доколку ситуацијата ескалира, таа би можела да прерасне во војна, иако засега останува ограничена на судири“, изјави тој, додавајќи дека владата презела мерки за заштита на националниот суверенитет и безбедноста на цивилното население.

Во меѓувреме, меѓународната заедница повикува на воздржаност и итен почеток на преговори. Сепак, како што расте бројот на жртви и раселени, изгледите за мирно решение стануваат сè понесигурни.