Како се поврзани Горан Марковски и фирмата ДИПКО основана од Градежниот факултет?

Во изборната трка за градоначалник на Скопје се вклучи проф. д-р Горан Марковски, декан на Градежниот факултет при Универзитетот Свети Кирил и Методиј.

За јавноста во Македонија, името на Горан Марковски не е непознато од стручен аспект, но беше изненадување неговата одлука да се вклучи во трката за градоначалничката позиција во градот Скопје. Марковски е кандидат на граѓанската платформа „Независни заедно“, исто како и Билјана Ивановска, поранешната претседателка на антикорупциска комисија, односно ДКСК, којашто освен од платформата „Независни заедно“, ее  поддржана од граѓанските иницијативи „Шанса за Центар“,  „Зелените за Гази Баба“ и „Групација 398“.

Во пребарувањето за подобро запознавање со кариерата на проф. д-р Горан Марковски, Рацин.мк дојде до податоци за фирмата ДИПКО дооел, за која во Централниот регистер стои дека е основана од Градежниот факултет (ГФ) при УКИМ и дека ГФ е и сопственик на компанијата.

ДИПКО дооел е регистрирана како друштво за инженеринг, проектирање, консалтинг и обука по шифрата 71.120 инжинерски дејности поврзано со техничко советување, се разбира со своја посебна сметка.

Управител на ДИПКО е д-р Златко Богдановски, инаку Продекан за наука и меѓународна соработка во Деканатот на Градежниот факултет, каде што шеф, односно декан е проф. д-р Горан Марковски.

Во финансиското резиме за ДИПКО во графата Вкупен приход стои дека фирмата во 2022 година имала вкупен приход во висина од 14.598.000 денари, во 2023 година 25.562.000 денари, а во 2024 година 76.049.000 денари.

Пребарувањето на интернет не открива многу за активностите на ДИПКО, но од она што може да се најде како податок компанијата извршува работи од консултантска природа, како и од стручен аспект, како што било учеството во студијата за оценка за влијание за животната средина за рудникот Саса од Македонска Каменица.

ДИПКО се среќава и во списокот на добитници на иновациски ваучери на Фондот за иновации и технолошки развој каде што е наведени дека компанијата учествувала во изработка на софтверски модул за динамичка и модална анализа за ДИГИТЕКС СИСТЕМС ДОО експорт-импорт Скопје.

Од сето ова произлегуваат неколку прашања од овие информации:

Зошто Градежен факултет има потреба да основа дооел?

Каква е непосредната поврзаност на ДИПКО дооел со факултетот или се работи за посебна и независна компанија?

Ако ДИПКО е формирана како компанија за инженеринг, проектирање, консалтинг и обука, дејности што во целост ги покрива и факултетот, зошто имало потреба да се формира нова фирма?

Кои луѓе се вклучени во зделките на ДИПКО за инженеринг, проектирање, консалтинг и обука?

Дали во зделките на ДИПКО се вклучени професорите на Градежен факултет? Дали меѓу нив се и членовите на деканатот, вклучувајќи го и деканот?

Сите овие прашања Рацин.мк ги испрати до управителот на ДИПКО д-р Златко Богдановски, кој, како што рековме е и Продекан за наука и меѓународна соработка во Деканатот на Градежниот факултет.

И на крајот, но не помалку важно, би било интересно Билјана Ивановска, како поранешна претседателка на ДКСК и експерт за борба против корупција, да каже дали во случајот на ДИПКО, основан од Градежниот факултет и деканот на факултетот д-р Горан Марковски има судир на интереси.