Кој, како, колку и кога ќе купува гласови од граѓаните, Меџити и Османи околу плаќањето на волјата на гласачите

Првиот вицепремиер и кандидат на ВЛЕН за градоначалник на Општина Чаир, Изет Меџити, преку соопштение испратено од неговиот кабинет, реагираше на изјавите на кандидатот на ДУИ, Бујар Османи, кој изјави дека „ВЛЕН еден ден пред избори ќе ги купи гласовите во Чаир“.

Меџити, во изјава за медиумите рече дека со навредливиот речник, Османи не само што ги потценува граѓаните на Чаир, туку и самиот се демаскира, признавајќи дека тој и партијата ја градела власта врз купување и злоупотреба на гласови.

„Што значи тоа? Дека тој ги купувал гласовите за ДУИ? Смешно и неразбирливо е како еден поранешен министер не е благодарен кон гласачите на Чаир, кои со години му ја дале довербата“, изјави Меџити.

Тој додаде дека гласачот на Чаир е мудар и достоинствен, не се купува ниту се продава, и овојпат, на 19 октомври, ќе ја казни ароганцијата и потценувањето.

Од друга страна пак, кандидатот за градоначалник на Чаир, Бујар Османи, во своето обраќање до јавноста истакна дека во општината се крева ново движење, движење на отпорот и достоинството, кое, како што рече, е поголемо од било која изборна кампања.

„Сакам јасно да кажам: на 19 октомври народот на Чаир ќе излезе масовно и ќе го порази системот за купување на волјата на граѓаните, никој не може да го обезвредни нивниот глас ако луѓето масовно излезат и ја изразат својата волја. Никој! Ова не се обични избори. Ова е отпор и започнува движење за нов Чаир,“ изјави Османи.

Османи потенцираше дека она што се случува во Чаир е поголемо од изборна кампања.

„Изборите во Чаир се историски. Се буди енергија на отпор. Отпор кон начинот на управување. Кон корупцијата. Кон уцените. Кон клиентелизмот. Она што го гледам овие денови е мотивација за мене. Ни се придружуваат луѓе кои не се од ниту една партија: наставници, активисти, занаетчии… кои сами доаѓаат и велат: ова е историска шанса да го ослободиме Чаир,“ изјави Османи.