Обид за изнуда во Неготино: Жител се заканувал и барал 3.000 евра од градоначалникот

Почната е истражна постапка против жител на Неготино кој се сомничи за обид за изнуда и закани кон градоначалникот на општината.

Сомнежите се дека кривичните дела „изнуда“ и „загрозување на сигурноста“ се сторени во текот на септември.

На 2 септември, од анонимен фејсбук профил, осомничениот испратил порака со сериозни закани до градоначалникот и неговото семејство, обидувајќи се да го присили да му исплати 3.000 евра.

Во периодот од 4 до 18 септември, во неколку наврати, испраќал смртни закани на градоначалникот и на официјалната електронска пошта на општината, предизвикувајќи кај него и семејството чувство на несигурност и страв.

Поради опасност од бегство и можност за повторување на делото, јавниот обвинител побарал мерка притвор за осомничениот.