Филипче: Резолуцијата е јасна, ВМРО да не се прави дека не знае да чита

На изборната конвенција на СДСМ, претседателот Венко Филипче ја претстави партиската предлог-резолуција за европските интеграции со „црвени линии“ и ѝ порача на ВМРО-ДПМНЕ „да не се прави дека не знае да чита“. „За јазичните, идентитетските, историските и културните особености на македонскиот народ не се преговара со Европската Унија — јасно како ден,“ рече Филипче, додавајќи дека „уставните измени треба да бидат последната пречка и нема да има нови барања или прашања од билатерален и идентитетски карактер“.

Во остар тон кон власта, тој оцени дека државата се соочува со „разуздана власт“ што „работи исклучиво за себе“, обвинувајќи за партизација, лажен ПР и изостанати резултати по година и пол целосна централна власт. „Македонија и граѓаните за првпат имаат власт која работи само за себе, а граѓаните ѝ се на последно место,“ рече тој.

Филипче апелираше до разочараните левичари и апстиненти да се вратат во играта, тврдејќи дека неучеството на избори ја засилува неконтролираната власт. „Апстиненцијата не е казна за СДСМ, тоа е награда за ВМРО-ДПМНЕ да владее без контрола,“ порача, најавувајќи „нов почеток“ со кандидати „што живеат чесно, работат чесно и ќе служат чесно“.

„Нашата амбиција не е да владееме без контрола, туку да ја воспоставиме контролата што им припаѓа на граѓаните,“ истакна Филипче, нагласувајќи дека кампањата ќе се темели на остварливи, проверливи политики. „Не ветуваме спектакли, не нудиме лаги и шарени програми — нудиме служба за граѓаните.“

Зборувајќи за европскиот курс, тој повика на широк консензус околу резолуцијата и безусловно почитување на наведените позиции. „Нека не се прават дека не знаат да читаат или дека не разбираат што им напишавме,“ рече Филипче, подвлекувајќи дека СДСМ „пружa рака за обединување“ за стабилна и интегрирана Македонија.