Русија презема чекори за повлекување од договорот со САД за намалување на залихите на плутониум за оружје

Руската државна Дума одобри одлука за повлекување на земјата од историскиот договор со Соединетите Американски Држави, чија цел е намалување на огромните залихи на плутониум за оружје во земјата, останати од илјадници нуклеарни боеви глави од ерата на Студената војна.

Спогодбата за управување и отстранување на плутониум (ПМДА) меѓу Русија и САД од 2000 година ги обврза Москва и Вашингтон да уништат најмалку 34 тони плутониум за оружје, за кој американските претставници велат дека би бил доволен за производство на 17.000 нуклеарни боеви глави. Договорот стапи на сила во 2011 година.

-Соединетите Американски Држави презедоа голем број нови антируски мерки кои фундаментално ја менуваат стратешката рамнотежа што постоеше во времето на договорот и создаваат дополнителни закани за стратешката стабилност, се наведува во руската нота за законодавството за повлекување на Москва од договорот.

Откако демонтираа илјадници боеви глави од крајот на Студената војна, Москва и Вашингтон останаа со огромни залихи на плутониум, кој е скап за складирање и претставува потенцијален ризик од ширење.

Целта на Договорот за отстранување на плутониум меѓу Русија и САД беше да се уништи плутониумот за оружје со негово претворање во побезбедни форми – како нуклеарно гориво или со озрачување на плутониум во брзи неутронски реактори за производство на електрична енергија.

Во 2016 година, Русија го суспендираше договорот, наведувајќи ги санкциите на САД и она што Москва го опиша како непријателски дејствија против Русија, проширувањето на НАТО и промените во начинот на кој Вашингтон управува со своите залихи на плутониум.

Во тоа време, Русија изјави дека САД не ги исполниле условите на договорот откако Вашингтон, без одобрение од Москва, почна да меша дел од своите залихи на плутониум со инертни материјали (за да се намали можноста за нуклеарна верижна реакција) и да ги складира во специјални подземни складишта каде што може да се складираат.

Русија и Соединетите Американски Држави се најголемите нуклеарни сили во светот и заедно имаат околу 8.000 нуклеарни боеви глави, иако многу помалку од нивниот врв во 1986 година, кога Вашингтон и Москва имаа вкупно 73.000 боеви глави, според Федерацијата на американски научници.