Анкета: Само 25 посто од Украинците сметаат дека Зеленски треба да остане на власт по завршувањето на војната

Само 25 проценти од Украинците веруваат дека претседателот Володимир Зеленски треба да остане на власт по завршувањето на војната, според анкета објавена денеска од Меѓународниот институт за социологија во Киев.

Овој резултат е во спротивност со релативно високото ниво на доверба што тој продолжува да ја ужива кај јавноста, според истата анкета.

Според анкетата, 16 посто од испитаниците сметаат дека Зеленски треба да остане во политиката, но не и на власт. Во исто време, 36 отсто од испитаниците веруваат дека Зеленски треба да ја напушти политиката по војната, а дополнителни 14 проценти сметаат дека тој треба да се соочи со кривично гонење, покажа анкетата.

Според украинскиот Устав, следните избори се можни само по завршувањето на воената состојба, која беше прогласена на почетокот на руската инвазија во 2022 година. Зеленски објави дека нема да се кандидира за реизбор по завршувањето на војната.

Според анкетата, уделот на оние кои го поддржуваат Зеленски на водечка позиција не е ист како и неговиот изборен рејтинг. „За време на изборите, луѓето избираат помеѓу одредени учесници, па затоа составот на кандидатите може да ја одреди одлуката за кого ќе гласаат“, објаснуваат авторите на анкетата.

Анкетата покажа дека 60 посто од Украинците моментално му веруваат на Зеленски, додека 35 проценти не. Ова претставува мало зголемување на довербата во споредба со почетокот на септември и август, кога поддршката за Зеленски падна откако неговиот тим се обиде да ја поткопа независноста на клучните антикорупциски институции.

Меѓу Украинците кои не му веруваат на Зеленски, поддршката за неговото продолжување на претседателствувањето по војната е минимална. Мнозинството во оваа група, 57 проценти, велат дека Зеленски треба да биде гонет.

Кога Зеленски дојде на власт по претседателските и парламентарните избори во 2019 година, 80 отсто од Украинците му веруваа, но тој број падна на 37 посто до февруари 2022 година. Нивото на доверба нагло се зголеми на 90 проценти кога започна целосната руска инвазија.

Во најновото истражување, спроведено помеѓу 19 септември и 5 октомври, е користен репрезентативен примерок од 1.008 возрасни лица од сите региони на Украина, со исклучок на областите под руска окупација.