Skip to content
Преговорите меѓу Авганистан и Пакистан, одржани во Истанбул со посредство на Турција и Катар, завршија без постигнување договор за долгорочно примирје, јавуваат извори запознаени со разговорите. Тоа претставува сериозен удар за напорите за стабилизирање на регионот по крвавите судири кои овој месец одзедоа десетици животи.
Главната цел на разговорите беше постигнување траен мир меѓу двата јужноазиски соседа, по серија вооружени инциденти долж границата — најтешки од доаѓањето на талибаните на власт во Кабул во 2021 година.
Двете страни претходно, на 19 октомври во Доха, се согласија на привремен прекин на огнот, но во Истанбул не успеаја да најдат заеднички јазик. Секоја страна ја обвинува другата за неуспехот на разговорите.
Според извор од пакистанските безбедносни служби, талибаните одбиле да се обврзат дека ќе ги контролираат пакистанските талибани — одделна милитантна група непријателски настроена кон Пакистан, за која Исламабад тврди дека дејствува неказнето на територијата на Авганистан.
Авганистански претставник, пак, изјавил дека преговорите завршиле по „напрегнати расправии“, додавајќи дека Кабул нема целосна контрола над групите кои во последните недели изведувале напади врз пакистанските сили.
Судирите започнаа по пакистанските воздушни напади во Кабул и други делови од Авганистан на почетокот на октомври, при што цел биле водачи на пакистанските талибани. Како одговор, талибанските сили извршиле напади врз пакистански воени позиции долж 2.600 километри долгата граница.
Минатиот викенд во борбите загинале најмалку 30 лица — пет пакистански војници и 25 пакистански талибани.
Американскиот претседател Доналд Трамп изразил загриженост поради прекинот на преговорите, а пакистанскиот министер за одбрана предупреди дека неуспехот во Истанбул може да доведе до „отворена војна“.
