Проверете ги гумите пред зимата – колку се стари и колку се безбедни?

Температурите последниве денови нагло паднаа, а наскоро се очекуваат мраз и лизгави патишта. Доколку не сте се подготвиле навреме, можно е да чекате со денови за термин кај вулканизер. Законот јасно пропишува дека во зимски услови (снег, кал, мраз) задолжително се користат зимски или целосносезонски гуми.

Но, како обичниот возач може да провери дали гумите се соодветни и безбедни?

Внимавајте на „алпскиот симбол“

Клучниот знак што треба да го побарате е симболот со планината и снегулката, познат како 3 Peak Mountain Snowflake (3PMSF). Овој симбол мора да биде втиснат на страната на гумата и потврдува дека гумата е тестирана и сертифицирана според стандардите на ЕУ (EC бр. 661/2009) и Американската агенција за безбедност во сообраќајот (NHTSA).

Гумите со овој симбол се официјално признаени како зимски гуми, а често се појавуваат и кај модели за сите сезони.

Иако некои гуми сè уште имаат ознака M+S (Mud and Snow), треба да се знае дека таа не значи дека гумата е тестирана според стандардизирани процедури. За гумите произведени по 1 јануари 2018 година, ознаката со планина и снегулка е задолжителна.

Преодниот рок за постарите гуми што имаа само ознака M+S (произведени до 31 декември 2017) истече на 30 септември 2024 година.

Како се разликуваат зимските гуми од летните?

Зимските гуми имаат подлабок шара со повеќе канали и ламели, кои подобро ја одведуваат водата и кашата. Составот на гумата е помек, со повисок процент на силициум, што овозможува подобро прилегање на студени патишта.

Како да ја препознаете летната гума?

Летните гуми имаат порамна шара, со изразени надолжни канали што ја одведуваат водата. Нивниот состав е потврд и прилагоден на повисоки температури, за да се обезбеди стабилност и помала потрошувачка.

Гуми за сите сезони – компромисно решение

Како што кажува и името, овие гуми се дизајнирани да функционираат во сите временски услови. Тврдоста и шарата се комбинација меѓу летните и зимските модели. Новите целосносезонски гуми, исто така, мора да го имаат алпскиот симбол за да бидат законски прифатливи.

Како да ја проверите староста на гумата?

Староста на гумата се чита преку DOT бројот отпечатен на нејзината страна. Првите две цифри означуваат недела на производство, а последните две – годината.
Пример: DOT 0118 значи дека гумата е произведена во првата недела од 2018 година.

Совет: Доколку гумите се постари од 6 години, дури и ако изгледаат во добра состојба, препорачливо е да се заменат – бидејќи материјалот со време ја губи еластичноста и безбедноста.