Skip to content
На железничката пруга во Словачка вечерва се судриле два воза, при што најмалку десет лица се повредени, јавуваат словачките медиуми. Несреќата се случила околу 19:30 часот по локално време, на делницата меѓу градовите Пезинок и Свети Јур, веднаш по напуштањето на станицата Пезинок.
Според првичните информации, се судриле возовите Ex 620 и Rex 1814, кој сообраќал на релацијата Нитра – Братислава.
На местото на несреќата веднаш пристигнале сите итни служби, потврди Регионалната дирекција на полицијата во Братислава. Од железничката компанија ZSSK и Словачките железници (ŽSR) соопштија дека патниците се евакуирани и им е укажана медицинска помош.
Портпаролката на ŽSR, Петра Ланикова, изјави дека спасувачите работат на преместување на патниците на безбедна локација и на згрижување на повредените.
Премиерот Роберт Фицо повика на смиреност и изјави дека сите спасувачки служби се активирани. „Сега треба да бидеме обединети и да мислиме на повредените, а не да шириме омраза“, порача тој преку социјалните мрежи.
По завршувањето на спасувачките активности ќе следи темелна истрага за да се утврди дали несреќата е предизвикана од технички дефект или човечка грешка.
Инцидентот се случи северно од Братислава, а железничкиот сообраќај на оваа делница е привремено прекинат.
