Skip to content
Министерството за култура на Србија остро ги осуди најавите и јавните притисоци за забрана на изложбата на фотографии „Српкиња“, закажана за денес, 11 ноември во Вуковар, по повод Денот на примирјето.
Во соопштението се наведува дека станува збор за „безобзирен напад врз историското сеќавање, слободата на изразување и непочитување на улогата на жените во Првата светска војна“. Министерството истакнува дека обидите за забрана го откриваат „длабокиот ревизионизам и постојаното искривување на историјата“.
„Она што ја покажува длабочината на цинизмот е верувањето дека самиот повод или назив на изложбата се провокативни… Товарот на ревизионизмот, кога ќе започне со фалсификување на историјата, ја повлекува со себе и безмерната беспринципиелност“, се наведува во соопштението.
Министерството потсетува дека историското искуство на српскиот народ препознава забрани и прогон на културата – „културоцид“ – како симбол на омраза и вовед во страдања со епски размери.
„Самото паметење не е доволно за да ја спречи омразата – напротив, често ја провоцира нејзината сила. Сето ова мора да нè води кон поголема посветеност на почитувањето на културната и секоја друга слобода,“ порача Министерството.
По инцидентите во Сплит и Загреб за време на одбележувањето на Денот на српската култура, градоначалникот на Вуковар Маријан Павличек побара одложување на изложбата. Хрватската министерка за култура Нина Обуљен Коржинек изјави дека не ја оспорува содржината, но смета дека изложбата не е соодветна „во овој чувствителен период“ поради впечатокот што го остава.
Овој спор околу изложбата „Српкиња“ повторно го отвори прашањето за културните слободи, толеранцијата и односот кон историското паметење во регионот.
