Skip to content
Доналд Трамп силно притиска за постигнување мировен договор во Украина. Киев, иако сака мир уште повеќе, не е подготвен да го направи тоа по секоја цена, пишува BBC во анализата на најновиот обид за примирје.
Првиот предлог што го туркаше Вашингтон бил толку наклонет кон руските барања што американскиот државен секретар Марко Рубио морал јавно да негира дека документот го напишал Кремљ. Но Трамп бил јасен: Украина мора брзо да потпише, инаку ќе се соочи со „неодредени последици“.
Затоа Киев мораше да учествува во итните преговори во Женева, каде што се среќаваа делегации од САД и Украина, а процесот го следеа и советници од Германија, Франција и Велика Британија.
„Огромен напредок“, но без детали
Рубио во неделата вечерта изјави дека е постигнат „огромен напредок“, но одби да каже кои се двете нерешени точки. САД и Украина најавија дека има „нов договор“ – ажуриран верзиски документ кој сè уште не е објавен.
Според украински дипломати, станува збор за план од 19 точки, во кој од првичната верзија „останало многу малку“.
Европските измени документот го прават поприфатлив за Украина
Новата верзија, според Reuters, ги вклучува европските предлози:
- Нема автоматско вето за идно членство на Украина во НАТО.
- Нема ограничувања за бројот на украински војници.
- Западни сили нема трајно да бидат распоредени во Украина, но не постои целосна забрана.
- Нема предавање територии. Украина би ги враќала окупираните области исклучиво дипломатски.
- Во целост е отстранета идејата за општа амнестија за воени злосторства.
- Најважно: документот содржи безбедносни гаранции.
Неколку европски лидери, меѓу кои британскиот премиер Кеир Стармер, бараат гаранции слични на член 5 од НАТО – обврска за одбрана на Украина во случај на нов напад.
Германскиот канцелар Мерц го нарече новиот документ „значително изменет – и тоа во позитивен правец“.
Како документот се смени преку ноќ?
BBC наведува дека е нејасно како од предлог кој бил речиси копија на руските барања се стигнало до текст кој Украина би можела да го прифати – барем еден ден.
Трамп, кој претходно ги напаѓаше украинските лидери за „неблагодарност“, сега тврди дека „нешто добро“ може да произлезе од новата рунда преговори.
Но засега нема доказ дека Русија е подготвена да се откаже од борбите без голем притисок. Напротив – руските воени успеси, кризата во Киев и проблемите со мобилизацијата го зацврстиле ставот на Путин.
Многу дипломатија, малку поместување
BBC наведува дека и покрај деновите интензивни преговори, впечатокот е дека кружиме околу истата точка.
„Рускиот став е: ги дадовме нашите барања – ќе ги прифатите или не? Ако да, ќе престанеме со војната. Ако не – ќе чекаме додека не бидете подготвени“, вели аналитичарката Татјана Становаја.
