Skip to content
Радио-телевизијата на Босна и Херцеговина (BHRT) соопшти дека во четврток, 27 ноември 2025 година, вработените ќе одржат протест пред зградата на Парламентарното собрание на БиХ поради долгогодишно игнорирање на законските обврски, неспроведување на Законот за јавниот РТВ систем на БиХ и, како што наведуваат, системско уривање на единствениот јавен медиумски сервис на државно ниво. Истовремено, од истото место, BHT1 и BH Radio 1 ќе емитуваат повеќечасовна специјална програма под наслов „НЕ ГО ГАСЕТЕ BHRT“, целосно посветена на актуелната криза, причините за нејзиното настанување и последиците што можат да ги имаат врз сите граѓани на Босна и Херцеговина.
Колегиумите на BHT1 и BH Radio 1 претходно испратија заедничко писмо до најважните државни институции, меѓународната заедница и граѓаните на БиХ, предупредувајќи дека BHRT се наоѓа во „последната фаза на уривање“ затоа што законите кои самиот Парламент ги донел – не се применуваат. Во писмото нагласуваат дека со години се толерира кршењето на Законот за јавниот РТВ систем од страна на Радио-телевизијата на Република Српска, чиј долг кон BHRT надминува 100 милиони КМ, што, како што истакнуваат, претставува егзистенцијална закана за опстанокот на државниот јавен сервис.
Посочуваат и на недостаток на финансиски средства, застарена и нефункционална техника, ограничени излегувања на терен, отежнато планирање и реализација на програмски проекти, како и континуираното заминување на квалитетен кадар. Сето тоа ја загрозува основната функција на јавниот сервис – да информира, образува и им служи на граѓаните.
И покрај тешките околности, BHRT наведува дека продолжува да ја исполнува својата мисија и останува посветен на јавноста. Известуваат од сите делови на БиХ, ги пренесуваат седниците на двата дома на Парламентот, реализираат преноси на големи спортски настани, работат во сите вонредни ситуации како поплави, пожари и земјотреси и продолжуваат да создаваат образовни, културни и документарни програми, како и содржини наменети за лица со оштетен слух и вид.
Во писмото се нагласува дека, доколку целта на политичките актери е Босна и Херцеговина да остане без јавен медиумски сервис и независно новинарство, „фер би било тоа јавно да им се соопшти на граѓаните“.
Вработените потенцираат дека не се борат за привилегии, туку за почитување на законите и опстанок на институцијата чиј основач е Парламентот на БиХ. „Пратениците, кои ни се основачи, нè изневерија. Бараме одговорност и дејствување – во интерес на граѓаните на БиХ, со чии пари се финансира јавниот сервис“, порачуваат вработените, повикувајќи ги граѓаните, колегите новинари и граѓанскиот сектор да им се придружат на мирниот протест закажан за четврток во 10:00 часот пред Парламентот. Политичарите не се поканети, бидејќи ги сметаат најодговорни за состојбата во која се наоѓа BHRT.
Покрај протестот, BHT1 и BH Radio 1 во четврток целосно ќе ја изменат програмската шема и во текот на денот ќе емитуваат специјална програма посветена на кризата на јавниот сервис. Повеќечасовниот пренос во живо ќе опфати разговори за законската рамка, финансирањето, РТВ таксата, социјалниот статус на работниците, јавната улога на BHRT, дигитализацијата, техничките капацитети и европските стандарди. Во програмата ќе учествуваат уредници, новинари, техниката и водителите на BHRT, но и експерти од областа на медиумите, академската заедница, граѓанското општество, синдикатите и правосудството. По Дневник 2 ќе биде емитуван преглед на најважните моменти од протестот и специјалната програма.
BHRT потсетува дека е еден од најстарите јавни сервиси во регионот, со традиција долга 80 години, и дека неговото гасење би значело дека Босна и Херцеговина станува единствената европска држава без јавен радио-телевизиски сервис. Во завршната порака наведуваат дека нема да го следат мирно уништувањето на институцијата што им припаѓа на граѓаните на БиХ, нагласувајќи дека ова е борба за јавниот интерес, за правото на вистина и за иднината на независното новинарство.
