Skip to content
Австрискиот дневен весник „Штандард“ пишува дека Владата на Србија пропуштила во изминатите месеци да најде решение за проблемот со санкциите кон Нафтената индустрија на Србија (НИС), поради што сега е под притисок и од САД, и од Русија. Според весникот, Кремљ не сака да го продаде својот удел во компанијата затоа што тој му обезбедува политичка контрола врз Белград.
„Владата на Србија сама е виновна за зависноста од Русија, бидејќи во 2008 година државата му продаде 51% од НИС на „Гаспром“ за смешно ниска цена од 400 милиони евра. Со тој договор, Белград практично купи гаранција дека Кремљ ќе го искористи својот вето-право во Советот за безбедност на ООН за да го спречи членството на Косово“, пишува „Штандард“.
Весникот потсетува дека Србија важи за еден од најблиските европски сојузници на Кремљ и дека политичката зависност доаѓа директно преку енергетиката. Поради тоа, претседателот Александар Вучиќ е под силен меѓународен притисок – и од Москва, и од Вашингтон.
Во текстот се наведува и дека кружат шпекулации дека „Гаспром“ би можел да основа компанија во Абу Даби и преку неа сам да си го откупи уделот во НИС, избегнувајќи директна продажба.
„Зависноста од Русија буди страв дека Кремљ може да ѝ ја затвори славината со гас на Србија, бидејќи и снабдувањето со гас е целосно врзано за Русија“, оценува весникот.
„Штандард“ додава дека „автократскиот режим“ на Вучиќ е под притисок и поради масовните демонстрации во земјата, како и поради меѓународните написи дека наводно бил вмешан во доведување странци подготвени да дејствуваат како снајперисти околу Сараево во текот на војната.
Весникот потсетува и дека Вучиќ неодамна изјави дека тој лично „никогаш не пукал“ и дека на снимките се гледа дека не носи автоматска пушка, туку статив – коментирајќи дека претходно тврдел дека тоа бил „чадор“.
