Skip to content
Бројот на жртвите во терористичкиот напад за време на прославата на еврејскиот празник Ханука на плажата Бонди во Сиднеј се искачи на 16 лица, соопштија австралиските власти. Нападот го извеле татко и син, а меѓу убиените има деца и возрасни – најмладата жртва имала 10, а најстарата 87 години.
Според официјалните информации, напаѓачите отвориле оган врз група луѓе кои го одбележувале првиот ден од Ханука. Постариот напаѓач бил убиен на лице место од полицијата, додека неговиот 24-годишен син е хоспитализиран и се наоѓа во критична состојба. Околу 40 лица се ранети, од кои дел се во тешка состојба.
Австралиските власти нападот официјално го прогласија за терористички чин. Според јавниот сервис ABC, во возилото на напаѓачите била пронајдена знаме на ИСИС, што дополнително ја зајакна сомнежта за радикална идеолошка мотивираност.
Објавени имињата на напаѓачите
Локалните медиуми, повикувајќи се на информации од безбедносните служби и CNN, објавија дека станува збор за Саџид и Навид Акрам. Таткото, 50-годишник, пристигнал во Австралија во 1998 година со студентска виза, додека неговиот син е роден во Австралија и е австралиски државјанин.
Безбедносните служби потврдија дека помладиот напаѓач бил под надзор на разузнавачките служби уште во 2019 година, но тогаш било проценето дека не претставува безбедносна закана.
Херојски чин среде хаосот
За време на нападот, еден од напаѓачите бил разоружан со голи раце од Ахмед ал Ахмед, продавач на овошје и случаен минувач. Неговиот херојски чин, според властите, спасил бројни животи. За неговото закрепнување досега се собрани речиси еден милион долари донации, а американски милијардер му донирал околу 100.000 долари.
Реакции и осуди
Австралискиот премиер Ентони Албанезе го нарече нападот „мрачен ден во историјата на Австралија“, најавувајќи построги закони за оружје, вклучително и ограничување на бројот на оружје што едно лице може да го поседува и редовна ревизија на дозволите.
Исламските заедници во Австралија остро го осудија нападот, истакнувајќи дека „антисемитизмот и насилството немаат место во австралиското општество“ и дека нападот, иако насочен кон Евреите, претставува напад врз сите граѓани.
Град во жалост
Во Сиднеј илјадници луѓе оддадоа почит на жртвите, оставајќи цвеќиња и палејќи свеќи во близина на местото на нападот. Граѓаните масовно даруваат крв, а властите најавија поддршка за семејствата на жртвите, вклучително и за оние кои доаѓаат од странство за погребите.
Истрагата за нападот продолжува.