Еден од „кумовите“ на вештачката интелигенција ги посочи професиите што се најзагрозени од технолошката револуција

Еден од таканаречените „кумови на вештачката интелигенција“ изнесе загрижувачка прогноза за тоа кои професии ќе ја преживеат технолошката револуција, во време кога стравот од масовни отпуштања предизвикани од вештачката интелигенција сè повеќе расте.

Компаниите веќе ја наведуваат „новата реалност“ како причина за отпуштања, а се очекува овој тренд дополнително да се забрза во обидите за намалување на трошоците, пренесува Index.

Канадскиот компјутерски научник Јошуа Бенџио, еден од најцитираните експерти во областа на вештачката интелигенција, во неодамнешно гостување во емисијата Diary of a CEO изнесе мрачна слика за влијанието што AI ќе го има врз пазарот на трудот. На прашањето кои професии се најзагрозени, тој одговори дека повеќе не станува збор за тоа дали ќе се случи, туку кога.

„Когнитивните професии – оние што се работат пред тастатура – се најранливи“, истакна Бенџио, додавајќи дека токму интелектуалната работа, која досега се сметаше за посигурна, прва ќе биде погодена од автоматизацијата.

Иако на прв поглед се чини дека луѓето кои извршуваат физички работи моментално се побезбедни, Бенџио предупредува дека тоа е само привремено. Тој посочува дека роботиката сè уште заостанува зад развојот на софтверската вештачка интелигенција, но напредокот е очигледен.

„Како што често вели Џеф Хинтон, ако работите физичка работа – можеби е паметно да бидете водоинсталатер. Но и тоа ќе трае одредено време. Мислам дека оваа сигурност е само привремена“, вели Бенџио, нагласувајќи дека и физичките професии на долг рок нема да останат недопрени.

Освен влијанието врз вработувањето, Бенџио предупреди и на подлабоки ризици поврзани со развојот на вештачката интелигенција. Според него, „злонамерна“ вештачка интелигенција би можела да предизвика далеку поголема штета доколку добие можност да контролира роботи во физичкиот свет.

„Доколку остане ограничена само на виртуелниот простор, мора да ги убедува луѓето да прават лоши работи. Но ако може директно да контролира машини, тогаш ризикот станува многу поголем“, објаснува тој.

Неговите предупредувања се совпаѓаат со ставовите на други водечки експерти. Доктор Роман Јампoлски смета дека до 2027 година „вработувањето луѓе за повеќето професии ќе стане бесмислено“, додека „Мајкрософт“ веќе објави листа од 40 занимања кои, според нивните анализи, се под најголем ризик да станат застарени.

Сите овие проценки укажуваат на длабоки промени што го очекуваат глобалниот пазар на труд и на период на сериозна неизвесност за милиони работници ширум светот.