Skip to content
Еден од најактивните вулкани на светот, хавајскиот Килауеа, еруптираше на Бадник, создавајќи спектакуларни и застрашувачки сцени во кои фонтани од врела лава достигнуваа височина и до 427 метри.
Шестчасовната ерупција се одвивала во кратерот Халемаʻумаʻu на Големиот остров, а била регистрирана со камери на Американскиот геолошки завод (USGS), пренесува USA Today. Драматичните призори можеа да се следат и во живо преку интернет-пренос.
Ерупцијата започнала во вечерните часови на 23 декември, а завршила нешто по 2 часот наутро на 24 декември, токму на Бадник. Според податоците на USGS, првите знаци на зголемена активност биле забележани околу 2:30 часот по локално време, кога од северните и јужните отвори на кратерот започнала силна ерупција на растопена лава.
Килауеа се наоѓа во рамки на Националниот парк „Хавајски вулкани“ и важи за еден од најактивните вулкани на планетата. Оваа ерупција е веќе 39-та регистрирана во текот на 2025 година. Претходната, 38-ма по ред, се случила претходно овој месец и траела речиси 12 часа.
Научниците проценуваат дека вулканот Килауеа започнал да се формира пред околу 280.000 години, а над морското ниво се издигнал пред приближно 100.000 години. И покрај честата активност, властите соопштуваат дека ерупцијата не претставувала директна опасност за населението, бидејќи се одвивала во строго контролирана зона.