Skip to content
Првиот човек на швајцарскиот кантон Вале изрази отворен гнев откако беше откриено дека барот во кој за време на новогодишната ноќ загинаа 40 млади луѓе не бил предмет на инспекциска контрола цели шест години. Во меѓувреме, обвинителството ги засилува напорите за утврдување одговорност за една од најтешките трагедии во поновата историја на земјата.
Градоначалникот на ски-центарот Кранс-Монтана оваа недела изјави дека барот „Le Constellation“ не бил проверен уште од 2019 година. Оваа информација предизвика силна реакција кај претседателот на кантоналната влада, Матијас Рејнар, кој за локалниот весник Le Temps изјави дека е длабоко вознемирен од сериозните институционални пропусти.
„Бев лут“, изјави Рејнар. „Поради овие тешки пропусти. И мислам дека е нормално човек да биде лут, но мора да ѝ дозволиме на правдата да си го направи своето.“
Според шефот на кантоналната служба за безбедност, изолациската пена во подрумот на барот – каде што избувнал пожарот за време на новогодишната прослава – требало редовно да се проверува согласно закон. Ова е спротивно на тврдењата на градоначалникот на Кранс-Монтана. Повеќето од загинатите биле тинејџери.
Уапсен еден од сопствениците
Во петокот, обвинителството одреди притвор за Жак Морети, еден од двајцата француски сопственици на барот. Судот во наредните денови ќе одлучи дали ќе му биде изречен формален притвор. Обвинителите ги истражуваат сопствениците поради сомнение за тешко кривично дело, а се споменува и убиство од небрежност.
Семејствата на жртвите веќе поднеле кривични пријави поврзани со пожарот. Партнерката на Жак Морети, Џесика Морети, јавно им се извини на семејствата на загинатите, а двојката соопшти дека е „скршена од болка“ поради трагедијата.
Во Швајцарија сè погласни се повиците одговорните да бидат изведени пред лицето на правдата. Дел од јавноста ја критикува истрагата и го доведува во прашање фактот што сопствениците толку долго биле на слобода.
„Одговорност ќе мора да понесат сите – вклучително и надлежните институции“, порача Рејнар.