Цукерберг го менува курсот: Mета отпушта 1.500 вработени и се откажува од метаверзумот

Компанијата Meta отпушта околу 1.500 вработени од одделот Reality Labs, задолжен за развој на виртуелната реалност, што претставува јасен сигнал за повлекување од проектот метаверзум, кој до пред неколку години беше во центарот на визијата на Марк Цукерберг.

Според „Волстрит џурнал“, отказите опфаќаат речиси 10 отсто од вработените во тој сектор, а во рамки на реструктурирањето се затворени и три студија за развој на VR игри. Платформата Horizon Worlds ќе продолжи да функционира, но во значително намален обем.

Фокусот се префрла кон вештачка интелигенција

Од компанијата потврдија дека Meta сè повеќе ги насочува инвестициите кон вештачка интелигенција и носиви уреди, како што се паметните очила. Портпарол на Meta за WSJ изјави дека дел од средствата од метаверзумот ќе бидат пренаменети за AI-проекти.

Причината за ваквиот заокрет лежи и во огромните финансиски загуби – од 2020 година досега, Reality Labs има акумулирано над 77 милијарди долари загуба. Аналитичарите оценуваат дека повлекувањето од метаверзумот е логичен, но задоцнет потег, а и самиот Цукерберг уште во 2023 година почна да се дистанцира од овој концепт во јавните настапи.

Неизвесна иднина за AI очилата

Иако Meta сега се обложува на развој на паметни очила со вештачка интелигенција, нивниот пазарен успех останува неизвесен. Минатата недела компанијата привремено ги суспендираше меѓународните испораки поради проблеми со залихите, а експертите предупредуваат на дополнителни пречки, како што се строгите регулативи за приватност и заситениот пазар.

Сепак, според „Блумберг“, Meta размислува за зголемување на производството од планираните 10 на 20 милиони уреди, со можност до крајот на 2026 година бројката да достигне и 30 милиони, доколку побарувачката го дозволи тоа.

Метаверзумот – проект што останува во минатото

Иако пред неколку години Meta го сметаше метаверзумот за иднина на интернетот, денес е јасно дека таа визија полека згаснува. Компанијата сега се насочува кон попрактични технологии, со надеж дека вештачката интелигенција ќе биде новиот двигател на растот.