Skip to content
Намалувањето на телесната тежина кај патниците значи и помала потрошувачка на гориво
Сѐ поголемата употреба на лекови за слабеење, како што се Ozempic и Wegovy, може да им донесе заштеда од дури 580 милиони долари годишно на најголемите американски авиокомпании, покажува анализа на финансиската компанија Jefferies, објавена од „Блумберг“.
Причината е едноставна – полесни патници значат и полесни авиони, а со тоа и помала потрошувачка на гориво, што е еден од најголемите трошоци во авиоиндустријата.
Помалку килограми – помали трошоци
Во минатото, авиокомпаниите применуваа различни мерки за намалување на тежината на леталата – од отстранување на списанија, преку минимизирање на оброци, до ултратенки седишта. Денес, според аналитичарите, ефектот го постигнуваат самите патници.
Четирите најголеми американски авиопревозници, меѓу кои United Airlines и Delta Air Lines, годинава се очекува да потрошат околу 38,6 милијарди долари за гориво. Според проценките, доколку просечната тежина на патниците се намали, трошоците за гориво би можеле да се намалат за до 580 милиони долари.
„Со оглед на тоа што лековите за слабеење сега се достапни и во таблети, а стапката на дебелина опаѓа, ефектот врз телесната тежина може да има пошироки економски последици“, се наведува во анализата.
Поголема заработка за авиокомпаниите
Во извештајот од 12 јануари се наведува дека намалување на телесната тежина за 10% може да донесе заштеда од 1,5% во потрошувачката на гориво, што би резултирало со раст на заработката по акција од околу 4%.
Податоците покажуваат и дека во САД веќе три години по ред опаѓа стапката на дебелина кај возрасните, додека бројот на лица кои користат лекови за слабеење е речиси удвоен.
Не се пресметани загубите од храна
Аналитичарите напоменуваат дека во пресметките не се вклучени можните загуби од помала продажба на храна и грицки во авионите, што би можело делумно да го ублажи позитивниот финансиски ефект.
Сепак, трендот е јасен – фармацевтските иновации, иако развиени за здравствени цели, сѐ повеќе имаат и директно влијание врз глобалната економија, па дури и врз авиоиндустријата.