Трамп тргна за Давос по дефект на „Ер Форс Уан“, патувањето продолжи со друг авион

Американскиот претседател Доналд Трамп сепак отпатува за Давос, откако претседателскиот авион „Ер Форс Уан“ беше принуден да се врати во САД поради помал електричен дефект, јавуваат американските медиуми.

Авионот полетал кон Швајцарија, но набргу по полетувањето е донесена одлука да се врати во воздухопловната база „Ендрјус“, откако бил забележан проблем со електричниот систем. Од Белата куќа соопштија дека станува збор за превентивна мерка и дека безбедноста на патниците не била загрозена.

Според портпаролката на Белата куќа, Каролин Левит, екипажот забележал „помал електричен проблем“, по што авионот променил курс над Атлантикот и безбедно слетал назад во САД. Новинарите кои патувале со претседателот известија дека по слетувањето била организирана брза логистика за продолжување на патувањето.

Неколку часа подоцна, Трамп се качил во друг авион и го продолжил патот кон Давос, каде што треба да учествува на Светскиот економски форум.

„Ова ќе биде интересно патување“

Непосредно пред поаѓањето, Трамп им изјавил на новинарите дека го очекува „интересно патување“.

„Ова ќе биде интересно патување. Немам поим што ќе се случи, но добро сте застапени“, изјави тој.

Тензии околу Гренланд и критики кон ОН

Патувањето на Трамп во Давос се одвива во чувствителен политички момент, поради неговите изјави за можноста САД да го преземат Гренланд, што предизвика реакции во Европа и тензии со сојузниците во НАТО.

Трамп во изјави за медиумите повторно го критикуваше Обединетите нации, оценувајќи дека организацијата „не го остварила својот потенцијал“ и дека не успеала да ги реши конфликтите за кои, според него, неговата администрација нашла решенија.

„ОН требаше да ги реши тие војни. Јас никогаш не отидов кај нив. Тие требаше да си ја завршат работата“, изјави Трамп, додавајќи дека неговата администрација заслужува признание за мировните напори.

Во меѓувреме, европски лидери, меѓу кои и францускиот претседател Емануел Макрон, предупредија дека ваквата реторика ја поткопува меѓународната стабилност, додека дел од американските конгресмени изразија загриженост поради заканите кон сојузниците.

Трамп во Давос најави низа билатерални средби, меѓу кои и разговори поврзани со иднината на НАТО, глобалната безбедност и економските односи.