Skip to content
Општина Охрид излезе со јавно соопштение по критиките на граѓанската иницијатива „Охрид СОС“, која оцени дека локалната власт ја релативизира сериозноста на наодите од ревизорскиот извештај на Државниот завод за ревизија (ДЗР). Од Општината тврдат дека извештајот не треба да се чита како пресек само на актуелната администрација, туку како анализа што опфаќа период од 2019 до 2024 година и повеќе мандати, со слабости што, како што велат, се акумулирале со години.
Во соопштението, Општина Охрид наведува дека веднаш по приемот на извештајот започнала имплементација на препораките преку дефинирање мерки, рокови и одговорни лица, со цел да се унапреди финансиското и административното работење. Притоа нагласуваат дека треба да се прави разлика меѓу ревизорски забелешки и препораки и дека ДЗР дава насоки во повеќе сегменти, кои, според нив, веќе се преточуваат во конкретни чекори.
Една од најчувствителните точки, според Општината, е прашањето со бесправните градби. Локалната самоуправа повторува дека се работи за долгогодишен и сложен проблем, кој не настанал во текот на актуелниот мандат, и дека не поддржува незаконско градење. Тврдат дека активностите се насочени кон воспоставување ред и заштита на јавниот интерес, со посебен акцент на зачувување на природното и културното наследство на Охрид.
Општината се осврнува и на делот од јавните реакции во кои се споменува обвинителството. Од таму демантираат дека „во моментов има постапување“, појаснувајќи дека доставувањето на ревизорскиот извештај до обвинителството е законска обврска и редовна процедура, а администрацијата, како што велат, ќе ја обезбеди целата документација доколку биде побарана од надлежните органи.
Ревизорскиот извештај, пак, во јавноста отвори поширока дебата бидејќи ДЗР констатираше низа системски слабости: недонесени урбанистички планови за 20 населени места, отсуство на мерки за отстранување на бесправни објекти, проблеми со урбаната опрема и финансиското работење, како и констатации дека за илјадници случаи на одбиена легализација и стотици правосилни акти за нелегални градби не следеле соодветни постапки за отстранување. Во таков контекст, Општина Охрид оценува дека „селективното и сензационалистичко“ читање на делови од извештајот не придонесува за објективно информирање, и најавува дека ќе продолжи транспарентно да ја известува јавноста за преземените активности.