Во Милано најавени протести против агентите на ICE на денот на отворањето на Олимписките игри

Во Милано се најавени протести против присуството на американските агенти на Имиграциската и царинска служба (ICE), кои ќе бидат ангажирани за обезбедување на американската делегација за време на Зимските олимписки игри Милано–Кортина 2026.

Според италијанските медиуми, во Италија веќе пристигнал значителен број агенти на ICE, задолжени за безбедноста на американските спортисти, како и на американскиот потпретседател Џеј Ди Венс и државниот секретар Марко Рубио, кои ќе присуствуваат на свеченото отворање на Игрите.

Најавени протести под слоганот „ICE out!“

Под слоганот „ICE out!“, студентски организации и активисти најавија протест на 6 февруари, на денот на свеченото отворање на Олимписките игри. Протестот ќе се одржи на плоштадот „Пјаца дела Скала“ во Милано, кој организаторите симболично го преименуваа во „Пјаца Газа“.

Организатори на протестот се студентската организација Osa, движењето Potere al Popolo, како и про-палестински и про-венецуелски групи. На собирот се очекува и присуство на американскиот активист Крис Смолс, познат по своите протести против ICE.

Датумот не е случајно избран – токму тогаш во Милано пристигнуваат потпретседателот Венс и државниот секретар Рубио, кои се обезбедуваат од тимови на ICE. Овие агенти во САД се обвинувани за сериозни злоупотреби, вклучително и случаи со смртни последици.

Зголемени безбедносни мерки

Италијанското Министерство за внатрешни работи внимателно ја следи ситуацијата, а најавени се и дополнителни протести од синдикатот CGIL, како и од здруженијата ANPI и ARCI.

Во рамки на безбедносниот план, ангажирани се околу 6.000 припадници на полицијата, карабинерите, финансиската полиција и специјалните единици, како и локалните служби за ред и мир. Американската делегација ќе има и сопствен тим од околу 200 агенти на ICE, но нивните овластувања ќе бидат строго ограничени.

Ограничени овластувања за странските агенти

Агентите на ICE и нивната истражна служба (HSI) нема да имаат оперативни овластувања на италијанска територија. Тие ќе дејствуваат исклучиво како поддршка и ќе работат од оперативни центри, без право на интервенција во јавниот ред и мир.

За разлика од нив, агентите на ЦИА и ФБИ ќе соработуваат со италијанските безбедносни служби. Присутни ќе бидат и претставници на безбедносните служби на други земји учеснички, меѓу кои Кина и Русија, чии спортисти ќе настапуваат како „неутрални“.

Високо ниво на безбедност и кибер-заштита

За обезбедување на Олимписките игри се издвоени околу 50 милиони евра. Надзорот ќе се врши со дронови, камери, роботизирани системи и специјализирани единици.

Следната недела започнува со работа и центар за кибер-безбедност, кој ќе функционира 24 часа дневно и ќе биде задолжен за спречување сајбер-напади врз клучната инфраструктура на Игрите.

До 22 февруари ќе биде воведена и забрана за летови над пет „црвени зони“ – Олимпиското село, арената во Асаго, салата за брзо лизгање, хокеарската арена и Ледениот парк во Ро.

Во овие зони ќе важи засилена контрола, а лицата со криминално досие поврзано со насилство, дрога или кражби ќе бидат веднаш отстранети.