Луѓето се враќаат на Месечината по повеќе од 50 години

По првпат по повеќе од половина век, човештвото повторно се подготвува за лет кон Месечината. НАСА на 6 февруари ќе ја лансира мисијата Artemis II, со која четворица астронаути ќе заминат на десетдневно патување околу Месечината – историски чекор кон враќањето на човекот во длабоката вселена.

Иако мисијата не предвидува слетување на површината, таа претставува клучна фаза во американската програма за долгорочно човечко присуство надвор од орбитата на Земјата.

Втор чекор во програмата „Артемис“

Artemis II е втората мисија од програмата „Артемис“, започната во 2017 година со цел повторно да се испратат луѓе на Месечината, а подоцна и на Марс. Таа следува по успешната беспилотна мисија Artemis I, која во 2022 година успешно ја обиколи Месечината.

Астронаутите ќе летаат со новата вселенска летала Orion, лансирана со ракетата Space Launch System (SLS) – најмоќната ракета што НАСА некогаш ја изградила. Ова ќе биде првпат луѓе да патуваат со оваа технологија и прв човечки лет кон Месечината по мисијата „Аполо 17“ во 1972 година.

Подготовка за идните слетувања

За разлика од идните мисии, Artemis II нема да вклучува слетување. Екипажот ќе орбитира околу Месечината, ќе ја помине нејзината „темна страна“ и потоа ќе се врати на Земјата.

Мисијата има тестирачки карактер – ќе се проверат сите клучни системи за живот, навигација и безбедност, како и издржливоста на леталото при враќање во атмосферата со брзина од околу 40.000 километри на час, што ќе ги направи астронаутите најбрзите луѓе во историјата.

„Големо технолошко достигнување“

Според експертите, оваа мисија има огромно технолошко и стратешко значење.

„Ова е пресвртница за НАСА и за човештвото. За првпат луѓе ќе ја видат далечната страна на Месечината. Тоа е клучен чекор кон враќање на човекот на неговата површина“, вели истражувачот Џон Пернет-Фишер од Универзитетот во Манчестер.

Тој додава дека новата ракета и леталото се основа за идните мисии кон Марс, па дури и подалеку во Сончевиот систем.

Меѓународен екипаж

Екипажот на Artemis II го сочинуваат:

• Рид Вајсман
• Виктор Гловер
• Кристина Кох (САД)
• Џереми Хансен (Канада)

Вклучувањето на канадски астронаут ја нагласува меѓународната димензија на програмата, во која учествуваат над 60 земји потписнички на Артемис-договорите.

Што следува?

Доколку мисијата помине успешно, ќе се отвори патот за Artemis III, со која се планира повторно човечко слетување на Месечината и изградба на лунарната вселенска станица „Gateway“.

Леталото Orion користи европски сервисен модул произведен во Германија, кој обезбедува електрична енергија, кислород, вода и стабилност за време на летот.

Со оваа мисија, човештвото повторно прави голем чекор кон вселената – чекор што може да го одреди следниот век на истражување надвор од Земјата.