Skip to content
На источната железничка оска кон Бугарија денес се случи момент што секогаш изгледа поголем отколку што е во реалноста: пробиен е последниот тунел на делницата меѓу Бељаковце и Крива Паланка. Информацијата ја соопшти директорот на ЈП Железници Инфраструктура, Синиша Ивановски, наведувајќи дека станува збор за 15-тиот, последен тунел од вкупно 15 на втората делница од проектот.
Пробивањето тунели е една од најтешките и најризични градежни активности во вакви планински профили, па затоа и ова се продава како „поминување на најкритичниот праг“. Но токму во таа реченица се крие и проблемот: тунелите се само предуслов, не и железница. По пробивот следи потешкиот дел за јавноста да го види – стабилизација, дренажи, обложување, колосек, сигнализација, електроинсталации, безбедносни системи и тестирања. Затоа и самиот Ивановски признава дека динамиката на изведувачот не е на ниво на очекувањата и дека „вистински видлив прогрес“ допрва треба да се случи во следните месеци.
Оваа делница е само еден сегмент од пошироката слика. Источниот крак на Коридорот 8 во Македонија е околу 88 километри и се гради во три фази: од Куманово до Бељаковце, потоа Бељаковце–Крива Паланка, и финално Крива Паланка–Деве Баир. Првата фаза, според европските проектни прегледи, е веќе комплетирана и пуштена во функција, а третата – која треба да ја затвори врската до граница – останува „големото последно парче“ што ќе реши дали ќе имаме реална железничка врска со Бугарија или само серија изолирани градилишта.
Тука и се гледа зошто денешната вест лесно станува политички ПР. Коридорот се претставува како стратешка линија – и за економија и за НАТО – но стратешко не е пробивањето тунел, туку пуштањето пруга во сообраќај. А за тоа не се доволни фотографии и видеа, туку рокови, дисциплина во изведба и институции што ќе ја затвораат секоја „техничка позиција“ без да ја претвораат во кампањска победа.
Денешниот пробив, затоа, е добар сигнал – дека една од најкомплицираните градежни точки е мината. Но истовремено е и потсетник дека јавноста има право да бара едноставно мерило: кога ќе помине воз, а не кога ќе помине багер.