Администрација со 40 отсто поголема плата, работниците со прстот во уста

Владата најави дека вработените во администрацијата во следните две години ќе добијат околу 40 отсто повисоки плати, преку нов колективен договор што ги опфаќа и судската и обвинителската служба. Според најавата на премиерот Христијан Мицкоски, зголемувањето почнува со априлската исплата, преку линеарно нивелирање и дополнително покачување од 8 проценти, а со договорот се опфатени околу 10.000 вработени.

Веста беше претставена како „историски договор“, но таа доаѓа во момент кога најголем дел од работниците надвор од администрацијата влегуваат во 2026 година со далеку поскромна слика. Минималната плата од март е зголемена на 26.046 денари, што е раст од околу 1.600 денари, додека синдикатите со месеци бараат минималец од 600 евра и линеарно зголемување и на останатите плати. Федерацијата на синдикати уште во јануари побара зголемување на платите на сите работници за најмалку 6.000 денари преку раст на минималната плата.

Разликата меѓу двата пристапа е тешко да се сокрие и кога ќе се стават на маса бројките. Просечната нето-плата во јануари 2026 изнесувала 46.617 денари. Тоа значи дека минималната плата останува далеку под просекот, а уште подалеку од синдикалната сметка за основните трошоци. Според последниот објавен синдикален пресек за февруари, минималната синдикална кошничка достигнала 67.382 денари за четиричлено семејство.

Токму тука и се отвора главната политичка и социјална линија на спорот. Кога Владата зборува за администрацијата, зборува за договор, динамика и проценти. Кога станува збор за минималната плата и приватниот сектор, се повикува на законска формула, усогласување и разговори меѓу работодавачи и синдикати. Во јануари годинава, самиот Мицкоски порача дека Владата предложила раст од околу 40 проценти за администрацијата, додека за минималната плата ќе се постапува според закон.

Тоа создава и поинаква слика за приоритетите. Додека за околу 10.000 вработени во јавниот сектор се најавува раст што во две години треба да стигне до 40 проценти, најниско платените работници добија корекција која синдикатите веќе ја оценија како недоволна наспроти растот на трошоците. Во изминатите недели ССМ организираше протести и блокади со барање за повисока минимална плата, предупредувајќи дека цените растат побрзо од платите.

Во таква слика, договорот за администрацијата не останува само вест за плати, туку станува и мерка за тоа каде државата реагира побрзо и поодлучно. За службениците се потпишува колективен договор со јасна временска рамка. За останатите работници, особено за оние на минималец, и натаму важи моделот на чекање, усогласување и раст што тешко го стигнува месецот.