Фицо: Европа има големи проблеми со нафтата и горивата, есента и зимата ќе бидат тешки

Словачкиот премиер Роберт Фицо денес изјави дека Европската Унија има големи проблеми со нафтата и горивата и дека очекува таксите за емисии на стакленички гасови да ги зголемат цените на горивата, домувањето и енергијата, што ќе ги направи есента и зимата тешки.

На видеоконференцијата на групата „Пријатели на конкурентноста“, на која присуствуваа 19 европски лидери, Фицо рече дека Словачка, заедно со земјите од Вишеградската група, инсистира системот ETS2, кој предвидува дека емисијата на штетни гасови во зоната на ЕУ до 2030 година ќе биде намалена за 42 проценти, во споредба со 2025 година, да се воведе дури по 2030 година, пренесува Ta3.

Тој нагласи дека високите цени на енергијата, дозволите за емисии и горивото за Словачка, како индустриска земја со отворена економија, се клучни прашања во однос на економскиот раст и зачувувањето на работните места.

„ Конкурентноста на европската индустрија е неразделно поврзана со цените на енергијата “, рече Фицо.

Фицо го поддржа поедноставувањето на европските правила и намалувањето на административните и регулаторните оптоварувања, велејќи дека европските бизниси треба да се соочат со помалку бирократија за подобро да се натпреваруваат со компаниите од другите големи економии.

„Ако Европската Унија сака да преживее во глобалната конкуренција, мора да создаде услови во кои европската индустрија ќе може да произведува по конкурентни цени. За Словачка, прашањето за цените на енергијата и индустриската заштита е затоа апсолутен приоритет “, заклучи Фицо.