Skip to content
Лидерот на Движењето на социјалистите, Александар Вулин, најави дека ќе се кандидира за претседател на Србија на предвремените претседателски избори кои се очекува да се одржат во декември.
Вулин ја објави својата намера на партискиот собир „Српски свет“, одржан на 5 октомври, каде што истовремено ги повика своите приврзаници на парламентарните избори на 25 октомври да гласаат за листата „Александар Вучиќ – Обединета Србија“.
„Сакам да верувам дека секој следен претседател ќе биде претседател на Српскиот свет и, ако ја имам вашата поддршка, сакам да се кандидирам за претседател на Република Србија“, порача Вулин.
Тој додаде дека сака „Српскиот свет“ да има свој кандидат и свој глас, а се заложи и за референдум за членството на Србија во Европската Унија. Вулин истакна и дека Србија не треба да воведува санкции кон Русија.
На собирот Вулин говореше и за потребата од „обединување на Српскиот свет“, а во својот говор ја поврза својата евентуална кандидатура со политиката на зачувување на суверенитетот на Србија и нејзините односи со Русија.
Вулин со години е близок соработник на Александар Вучиќ. Бил министер за внатрешни работи и министер за одбрана, а ја предводел и Безбедносно-информативната агенција (БИА). Во 2023 година САД го ставија на листата на санкционирани лица, обвинувајќи го за активности поврзани со рускиот „малиген“ политички и безбедносен фактор.
Неговата најава доаѓа откако Вучиќ на 27 септември поднесе оставка од функцијата претседател на Србија, по што Ана Брнабиќ ја презеде функцијата вршител на должноста претседател до изборот на нов шеф на државата.
Претседателските избори сè уште не се распишани, но Вулин е првиот политичар кој јавно ја најави својата кандидатура.
