Skip to content
Добитничката на Нобеловата награда за мир, Наванетем „Нави“ Пилај, ја посвети својата награда на сите преживеани жртви на меѓународни злосторства и бранители на меѓународната правда, велејќи дека нивното сочувство и храброст обезбедиле дека неказнивоста нема да се толерира.
„Живееме во ера кога меѓународното право и човековите права се под значителен политички напад“, рече јужноафриканскиот адвокат на Нирнбершкиот форум, конференција за меѓународно кривично право во германскиот град.
85-годишната жена се сетила како ја слушнала веста кога директорот на форумот, Кристоф Саферлинг, ја извел од сесијата и ѝ рекол прво да седне. Претходно била во судницата 600 на Нирнбершката палата на правдата – просторијата каде што сојузниците ги суделе нацистичките воени злосторници, вклучувајќи го и Херман Геринг, по Втората светска војна.
Таа ја опиша Нобеловата награда како „сосема неочекувана“ и „прекрасно изненадување“, пренесува ДПА.
Признавање во време на притисок врз меѓународното право
Норвешкиот Нобелов комитет ја призна Пилај за нејзината работа во промовирањето на мирот и меѓународното право.
„Добив многу награди во мојот живот“, рече Пилај, но ова е „највисоката и најдобра“ почест што ја добила. Наградата доаѓа во време кога меѓународното право е под зголемен притисок, истакна таа.
„Оваа влошена реалност е особено видлива во нападите врз Меѓународниот кривичен суд“, рече победничката, која самата беше судија во судот во Хаг од 2003 до 2008 година.
Реакцијата на Меѓународниот кривичен суд
Судот во петокот изјави дека доделувањето на Нобеловата награда на Пилај е важно признание за улогата на меѓународната правда како основа за мир, објави Ројтерс.
„Ова е важно признание за клучната улога што ја игра меѓународната правда како камен-темелник на трајниот мир“, рече претседателката на судот, Томоко Акане.
„Во време на длабоки предизвици за меѓународниот правен поредок и владеењето на правото, ова признание има посебно значење“, додаде првиот човек на таа институција, која, меѓу другото, е самата цел на напади од страна на американските и израелските власти поради критиките кон Израел .
Честитки од Обединетите нации
Пилај, адвокатка од тамилско потекло која го застапуваше Нелсон Мандела во 1970-тите, доби честитки и од генералниот секретар на Обединетите нации, Антонио Гутереш.
„Таа покажа дека моќта на законот мора да го надмине законот на моќта и дека одбраната на човековите права е најголемата заштита од неправда“, напиша тој на платформата X.
