Skip to content
Американскиот претседател Доналд Трамп остро го нападна украинскиот претседател Володимир Зеленски, обвинувајќи го дека не сака да постигне мировен договор со Русија. Трамп изјави дека со Зеленски е потешко да се преговара отколку со рускиот претседател Владимир Путин и ги осуди украинските напади врз руските нафтени рафинерии.
Во интервју за американската телевизија „Њузмакс“, Трамп изјави дека Зеленски не е добар партнер за преговори и дека неговите постапки го отежнуваат завршувањето на војната.
„Зеленски не е човек со кого е добро да се соработува. Тој не сака договор. Вели дека сака, но всушност не сака. Не сум негов голем обожавател. Ја уништија таа земја“, изјави американскиот претседател.
Трамп оцени дека личниот непријателски однос меѓу Путин и Зеленски претставува дополнителна пречка за постигнување мировен договор.
„Путин го мрази Зеленски, а Зеленски го мрази Путин. Кога постои таква омраза, тешко е што било да се договори. Но, таа војна никогаш не требаше да започне“, рече Трамп.
На прашањето дали очекува војната да заврши пред истекот на неговиот претседателски мандат, Трамп одговори дека верува оти двете страни сакаат прекин на конфликтот.
„Мислам дека двајцата сакаат војната да заврши, но сметам дека со Зеленски е потешко да се преговара отколку со Путин“, изјави тој.
Американскиот претседател повторно го отвори и прашањето за одржување избори во Украина. Запрашан за можноста од двомесечен прекин на борбите за да се организира гласање, Трамп одговори дека смета оти изборите се неопходни.
Тој истовремено оцени дека Русија има значителна предност во човечки ресурси, поради што може подолго да ги надоместува воените загуби, додека Украина се соочува со недостиг од војници.
Критиките кон Зеленски следуваат по обновените украински напади врз руските нафтени рафинерии. Трамп оцени дека ваквите операции придонесуваат за зголемување на светските цени на енергенсите.
„Сметам дека тоа е срамно. Постојат многу други цели што може да се нападнат. Кога напаѓате рафинерии што произведуваат дизел, кој ни е потребен нам и на целиот свет, не му правите услуга на светот“, изјави Трамп.
Тензиите меѓу Вашингтон и Киев дополнително се зголемија по договорот што Трамп го постигна со Путин за испорака на руски дизел на американскиот и светскиот пазар.
Според најавата на американскиот претседател, Русија треба веднаш да испорача повеќе од 300.000 тони дизел, дополнителни 500.000 тони во ноември и уште еден милион тони во следниот период. Трамп најави и дополнителни испораки од три милиони тони.
Зеленски го критикуваше договорот, оценувајќи дека со него Вашингтон финансиски ѝ помага на Москва и ѝ овозможува да ја продолжи војната против Украина.
Украинскиот претседател во интервју со британскиот новинар Пирс Морган изјави дека се чувствува предаден од американската администрација, особено по одлуките поврзани со ограничувањето на користењето на сателитскиот систем „Старлинк“.
„Жално е што губиме силен партнер. Сигурен сум дека точно знаеја што прават“, изјави Зеленски, предупредувајќи дека ограничувањата може да предизвикаат дополнителни човечки загуби.
Украина во меѓувреме ги обнови нападите врз руската енергетска инфраструктура, погодувајќи рафинерија во регионот Рјазањ, југоисточно од Москва.
Зеленски порача дека Украина нема да прифати мировен договор што би значел откажување од нејзината територија или суверенитет.
„Ние не ја продаваме нашата земја. За нас ова не е бизнис. Ова се нашите животи, нашата земја, нашиот дом и нашите деца“, изјави украинскиот претседател.
