Skip to content
Сања Божиновска останува на чело на Министерството за енергетика, рударство и минерални суровини, откако Собранието денеска ја отфрли интерпелацијата за нејзината работа. За барањето на Левица гласаа 19 пратеници, 63 беа против, а воздржани немаше.
Опозицијата ја обвини министерката за лошо управување со енергетскиот сектор, непочитување на законите и недоволна заштита на јавниот интерес. Во расправата беа отворени прашањата за доцнењето на реформите за поврзување со европскиот пазар, откупот на струјата од фотоволтаиците и пречките за приклучување нови производствени капацитети.
Божиновска ги отфрли обвинувањата и порача дека политичкото несогласување не е доказ за незаконитост. Таа рече дека Министерството не ги води набавките и комерцијалните договори на ЕСМ, ниту ги определува тарифите на Регулаторната комисија за енергетика. Побара нејзината одговорност да се оценува според законските надлежности, документите и конкретните одлуки.
Пратениците од владејачкото мнозинство ја бранеа со новиот Закон за енергетика, субвенциите за ранливите домаќинства и инвестициите во енергетски капацитети. Како резултат го наведоа и намалувањето на производствениот трошок на ЕСМ, додека опозицијата побара поголема транспарентност и надзор врз секторот.
